हेटौंडा, १४ जेठ। हेटौंडामा एक गर्भवती महिलामा कोरोना संक्रमण पुष्टि भएको छ । १ चौकीटोलकी २५ वर्षीया गर्भवती महिलालाई कोरोना पुष्टि भएको हो ।
मुख जिल्ला अधिकारी दीपकराज नेपालका अनुसार कोरोना पुष्टि भएपछि चौकीटोलमा उनी बस्दै आएको घर सिल गरेर सतर्कता अपनाइएको छ ।
यही जेठ ९ गते चितवनबाट हेटौंडा आएकी उनको पीसीआर परीक्षणमा कोरोना पुष्टि भएको हेटौंडा अस्पतालका डाक्टर प्रविण श्रेष्ठले जानकारी दिए । उनको आरडीटी परीक्षण नेगेटिभ देखिए पनि पीसीआर परीक्षणमा कोरोना पुष्टि भएको डा. श्रेष्ठले बताए ।
उनलाई हेटौंडाबाट चितवनको भरतपुर अस्पताल लगिएको छ ।
उनी र उनका श्रीमान चितवनमा रोजगारीमा थिए । उनी चितवनबाट हेटौंडा आएपछि कोरोना परीक्षणका लागि स्वाबको नमूना संकलन गरिएको थियो ।
