यस्ता छन् मन्त्रिपरिषद् बैठकका निर्णय, राजदूतदेखि विद्युत् प्राधिकरणका कार्यकारी निर्देशक नियुक्तिसम्म

काठमाडौँ। सरकारले शुक्रबार बसेको मन्त्रिपरिषद् बैठकका निर्णय सार्वजनिक गरेको छ। सरकारका प्रवक्ता एवं शिक्षामन्त्री सस्मित पोखरेलले बैठकले गरेका प्रमुख निर्णयबारे जानकारी दिएका हुन्।

प्रधानमन्त्री तथा मन्त्रिपरिषद्को कार्यालयमा बसेको बैठकले १३ देशका लागि नेपाली राजदूत नियुक्तिको सिफारिस गरेको छ। सिफारिस भएका व्यक्तिहरूको नाम संसदीय सुनुवाइका लागि पठाउने निर्णयसमेत गरिएको छ।

भारतका लागि डा. निश्चलनाथ पाण्डे, चीनका लागि डा। कल्याणराज शर्मा, संयुक्त राज्य अमेरिकाका लागि चिरनजंग थापा र संयुक्त अधिराज्य ९यूके०का लागि पूर्वप्रधानसेनापति गौरव शम्शेर जंगबहादुर राणालाई राजदूतमा सिफारिस गरिएको छ।

त्यसैगरी जापानका लागि जिज्ञानकुमार थापा, इजरायलका लागि सुरेशकुमार कर्ण, स्पेनका लागि प्राप्ति शेरचन, जर्मनीका लागि शरू जोशी, ओमानका लागि डा। पद्माक्षी राणा र मलेसियाका लागि चूडामणि खरेलको नाम प्रस्ताव गरिएको छ।

दक्षिण कोरियाका लागि प्रा. डा. संगम श्रेष्ठ, श्रीलंकाका लागि डा। मंचला झा र साउदी अरेबियाका लागि गिरीबहादुर सुनारलाई राजदूत नियुक्तिका लागि सिफारिस गरिएको छ।

बैठकले ‘नेपाली नागरिकता पाँचौँ संशोधन नियमावली, २०८३’ स्वीकृत गर्ने निर्णय पनि गरेको छ।

यसअघि कृषि, वन तथा पर्यावरण मन्त्रालयअन्तर्गत रहेको नेपाल मौसम विभागलाई ऊर्जा, जलस्रोत तथा सिँचाइ मन्त्रालयअन्तर्गत राख्ने गरी नेपाल सरकार कार्यविभाजन नियमावली, २०८३ संशोधन गर्ने निर्णय भएको छ।

मन्त्रिपरिषद्ले नेपाल विद्युत् प्राधिकरणको रिक्त कार्यकारी निर्देशक पदमा काठमाडौँका दीर्घायुकुमार श्रेष्ठलाई नियुक्त गरेको छ। बैठकले सहसचिव रुद्रसिंह तामाङलाई राजपत्राङ्कित विशिष्ट श्रेणीको सचिव पदमा बढुवा गर्ने निर्णयसमेत गरेको छ।