रास्वपाका सांसदको भिडियो स्टन्टप्रति गोकुल बास्कोटाको कटाक्ष : भीआईपीहरूको भिडियो स्टन्टले गाईजात्रा बिर्सायो

काठमाडौं । राहत र उद्दारका लागि दक्ष जनशक्ति र सुरक्षाकर्मी जानुपर्ने ओसार्ने सेनाको हेलिकोप्टरमा रास्वपाका सांसद सागर ढकाल गए । उनी सेनाको हेलिकोप्टरमा गएनन्, मात्र सयौंको मृत्यु भइसकेको र हजारौं हराइरहेको देश नै शोकमा परेको बेला हास्दै फोटोसेसन गरेको तस्वीर सार्वजनिक भएपछि संवेदनहीनता पनि झल्कायो ।

अर्की रास्वपा सांसद आशिका तामाङले रातदिन खाईनखाई उद्दार र राहतमा परिचालन भएका स्थानीय जनप्रतिनिधिलाई गरेको दुब्र्यवहार पनि अशोभनीय नै देखिएको छ । फ्रुटी बाँडेर हिलोमा हिंड्दैमा बाढी प्रभावित क्षेत्रमा खटिएका स्थानीय तहका जनप्रतिनिधिलाई असभ्य तरिकाले गालीगलौज गरेको भिडियाले रास्वपाका जनप्रतिनिधि कस्ता छन्, सामाजिक संजालमा भ्युज बढाउने र पैसा कमाउन स्टन्टबाजी कसरी गर्दछन् भन्ने देखाएको छ ।

रास्वपाकै अर्का सांसद ज्वाला संग्रौला उर्फ टीकालाई त बाढी प्रभावित क्षेत्रमा जाँदा उद्दार नै गर्नुपरेको भिडियो भाइरल भइसकेको छ । यसरी बाढी प्रभावित क्षेत्रमा पुगेका रास्वपा सांसदहरुको स्टन्टले गाईजात्रा पनि बिर्साएको टिप्पणी एमाले नेता गोकुल बाँस्कोटाले गरेका छन् ।

बास्कोटाले विपद्का बेला उद्धार तथा राहतका नाममा भइरहेका गतिविधिप्रति कटाक्ष गर्दै गाईजात्रा बिर्साएको टिप्पणी गरेका हुन् ।

बास्कोटाले सामाजिक सञ्जालमार्फत विपद् प्रभावित क्षेत्रमा भइरहेका उद्धार तथा राहत गतिविधिको प्रदर्शनप्रति प्रश्न उठाउँदै ‘नीलो क्रान्ति’ वाला भीआईपीहरूको भिडियो स्टन्टले गाईजात्रालाई समेत बिर्साउने अवस्था आएको टिप्पणी गरेका हुन् ।

उनले जलवायु परिवर्तनका कारण विश्व नै गम्भीर संकटबाट गुज्रिरहेको उल्लेख गर्दै त्यसको असरप्रति धनी राष्ट्रहरूको बेवास्ता पनि उत्तिकै रहेको बताएका छन् । विपद्का बेला अन्तर्राष्ट्रिय तथा अन्य पक्षबाट सहयोग प्राप्त भए पनि त्यसलाई प्रस्तुत गर्ने शैलीप्रति भने उनले असन्तुष्टि जनाएका छन् ।

बास्कोटाले सामाजिक सञ्जालमा लेखेका छन्–‘विपतमा नीलो क्रान्तिवाला भीआईपीहरूको भिडियो स्टन्टले गाईजात्रा बिर्सायो। जलवायु परिवर्तनको भयानक असरले विश्व पीडित छ । र, धनी राष्ट्रहरूको वेमतलव पनि उस्तै ।’

उनले थप लेखेका छन्, ‘सहयोग त दिएकै छन्। तर यस्तो लाग्छ– त्यो आँशुको अन्तहीन व्यापार चलिरहन्छ ।’