११ वर्षका महत्त्वपूर्ण फैसला उपलब्ध गराउन सर्वोच्च बारको आह्वान

काठमाडौँ । सर्वोच्च अदालत बार एसोसिएसनअन्तर्गत गठित फैसला अध्ययन समितिले ११ वर्षको अवधिमा सर्वोच्च अदालतबाट भएका महत्त्वपूर्ण फैसला उपलब्ध गराउन कानुन व्यवसायीलाई अनुरोध गरेको छ।

समितिले २०७२ वैशाख १ देखि २०८२ चैत मसान्तसम्मका प्रकाशित तथा अप्रकाशित महत्त्वपूर्ण फैसला अध्ययनका लागि पठाउन आह्वान गरेको हो। प्राप्त फैसलाको अध्ययनपछि तयार हुने प्रतिवेदन सर्वोच्च अदालत बार एसोसिएसनलाई बुझाइनेछ।

सर्वोच्च अदालत बार एसोसिएसनले सर्वोच्च अदालतबाट भएका फैसलाको अध्ययन गर्न २०८२ भदौ १३ गते वरिष्ठ अधिवक्ता कोमलप्रकाश घिमिरेको संयोजकत्वमा समिति गठन गरेको थियो।

समितिको सहसंयोजकमा वरिष्ठ अधिवक्ता लभकुमार मैनाली छन्। प्रकाशबहादुर केसी, शरदप्रसाद कोइराला, माधवकुमार बस्नेत र कमलप्रसाद इटनी सदस्य छन् भने निर्मलप्रसाद उपाध्यायले सदस्य सचिवको जिम्मेवारी पाएका छन्।

समितिले सर्वोच्च अदालतबाट भएका तर औपचारिक रूपमा प्रकाशनमा नआएका महत्त्वपूर्ण फैसलासमेत संकलन गर्ने जनाएको छ। त्यस्ता फैसलासहित उपलब्ध सामग्रीको अध्ययन तथा विश्लेषण गरी समितिले प्रतिवेदन तयार पार्नेछ।

सर्वोच्च अदालतका कतिपय फैसलामाथि समय-समयमा सार्वजनिक तथा कानुनी क्षेत्रबाट प्रश्न र आलोचना उठ्ने गरेका छन्। यसअघि पनि फैसला अध्ययनका लागि समिति गठन गर्ने घोषणा भए पनि प्रभावकारी कार्यान्वयन हुन नसकेको सन्दर्भमा सर्वोच्च बारले यसपटक औपचारिक रूपमा फैसला संकलन अघि बढाएको हो।