स्काउटका निर्देशक कार्कीले सरकारमाथि दबाब बढाउन ककनीमा भेला बोलाए

काठमाडौं । नेपाल स्काउटका कार्यकारी निर्देशक अर्पण कार्कीले सरकारमाथि थप दबाब बढाउन प्रदेश प्रमुख आयुक्तहरुको भेला बोलाएका छन् ।

सातवटै प्रदेशका प्रमुख आयुक्तहरुको भेला शुक्रबार र शनिबार ककनीमा आयोजना गरिएको छ । फिनल्याण्डको सहयोगमा संचालित परियोजनाको समीक्षा तथा प्रतिवेदनलाई अन्तिम रुप दिने नाममा कार्कीले भेला डाकेका हुन् । उक्त परियोजनाको नाममा कार्यक्रम आयोजना गरिए पनि मूलतः उनले बिभागीय मन्त्री शिक्षा तथा खेलकुद तथा प्रमुख स्काउट सस्मित पोखरेल र मन्त्रालयप्रतिको आफूप्रतिको धारणा परिवर्तन गर्न दबाब दिनु हो ।

मन्त्रालयले नेपाल स्काउटमा देखिएको बेथिति र आर्थिक अनियमितताको बिषयका कारण मन्त्रालय र नेपाल स्काउटबीचको दूरी पछिल्लो समय बढ्दै गएको छ । त्यसमाथि उनकै नियुक्ति बैधानिकता र प्रशासकीय अधिकृत सन्तोष चौहानका बिषयमा मन्त्रालयले छानबिन गर्ने संकेत पाएपछि कार्की अत्तालिएका हुन् । कार्कीको नियुक्तिको बैधानिकताको बिषयमा मन्त्रालयमा उजुरी परेको र तत्कालीन सचिव लोकनाथ पौडेललाई प्रभावमा रोकेको आरोप छ ।

नेपाल स्काउटको अतिथि कक्षसहित चमेनागृह(क्यान्टिन) ककनीमा संचालित छ । सयौं रोपनीमा फैलिएको स्काउटको उक्त आवास गृह र चमेनागृहको करोडौं मासिक आम्दानी हुने गरेको भएता पनि कार्की र चौहान मिलेर अपारदर्शी रुपमा अनियमितता गरेको आरोप छ । मिलेमतोमा उठ्नुपर्ने बक्यौता असुल नगरिएको छ ।

आफ्नै सम्पत्तिको संरक्षण गर्न नसकेको नेपाल स्काउटको कार्यकारी नेतृत्वलाई जोगाउनका लागि प्रदेशका प्रमुख आयुक्तहरु बिहीबार नै विमानबाट काठमाडौंबाट आउँदैछन् । ककनीमा कोशी प्रदेश स्काउटका प्रमुख आयुक्त हेमन्त भण्डारी, मधेस प्रदेशका दिनेश यादव, बागमतीका शिव तोयाना, गण्डकीका सागर पौडेल, लुम्बिनीका दिनानाथ भट्टराई, कर्णालीका कमल बोहरा र सुदूर पश्चिमका नरेन्द्र थापा सहभागी हुनेछन् ।

लुम्बिनी प्रदेशका प्रमुख दिनानाथ भट्टराई निकट स्रोतका अनुसार भेला जुन नाममा आयोजना गरिएको भए पनि कार्यकारी निर्देशक चौहानले आफ्नो पद सुरक्षित गर्नका लागि गुहार माग्न खोजेका हुन् । सातवटै प्रदेशका प्रमुख आयुक्तहरुलाई पत्र र फोनमार्फत् अनिवार्य रुपमा उपस्थित हुन निर्देशक कार्कीले उर्दी जारी गरेका छन् । राष्ट्रिय कार्यसमितिको बिघटन र प्रमुख आयुक्तसमेत नभएको मौका छोपी करोडौंको फिनल्याण्डको प्रोजेक्टमा गरेको अनियमितता छोप्न भेला बोलाएर साक्षीका रुपमा राख्न खोजिएको आरोप कार्की र चौहानमाथि लागेको छ ।