प्रस्तावित प्रधानन्यायाधीशविरुद्ध संसदीय सुनुवाइ हुँदै, आजै अनुमोदन हुने

काठमाडौं । संवैधानिक परिषदले सिफारिस गरेका प्रधानन्यायाधीश डा. मनोजकुमार शर्माको आज संसदीय सुनुवाइ हुँदैछ ।

शर्माबिरुद्ध परेका उजुरीहरुको सुुनुवाइ गर्न सुनुवाइ समितिको बैठक आज बिहान ८ बजे बस्दैछ ।

बैठकमा प्रस्तावित प्रधानन्यायाधीश डा. मनोज शर्माविरुद्ध परेका उजुरीहरू खोल्ने तथा आगामी सुनुवाइ प्रक्रियाको कार्ययोजना तय गर्ने कार्यसूची रहेको छ ।

समितिले वैशाख २६ गते डा. शर्माविरुद्ध सार्वजनिक रूपमा उजुरी आह्वान गरेको थियो। उक्त अवधिमा कुल १६ वटा उजुरी दर्ता भएको समितिले जनाएको छ ।

उजुरीकर्तालाई स्पष्ट आधार, तथ्य र प्रमाणसहित निवेदन पेश गर्न १० दिनको समय दिइएको थियो । साथै उजुरी दिने व्यक्तिले आफ्नो नाम, ठेगाना र सम्पर्क नम्बर अनिवार्य रूपमा खुलाउनुपर्ने व्यवस्था गरिएको थियो ।

सोमबार उजुरी दर्ताको समयसीमा सकिएसँगै अब समितिले प्राप्त उजुरीमाथि विस्तृत छलफल, अध्ययन र छानबिन प्रक्रिया अघि बढाउने भएको छ । त्यसपछि प्रस्तावित प्रधानन्यायाधीश शर्मासँग प्रत्यक्ष संसदीय सुनुवाइ गरिनेछ ।

डा. शर्मालाई वैशाख २४ गते बसेको संवैधानिक परिषद् बैठकले नेपालको प्रधानन्यायाधीश पदका लागि सिफारिस गरेको थियो ।