आजदेखि एसईईको परीक्षाः परीक्षाफल एक महिनाभित्र प्रकाशित गरिने

काठमाडौं । यो बर्षको माध्यमिक शिक्षा परीक्षा (एसईई) परीक्षा आजदेखि सुरु हुँदैछ । आज बिहान ८ बजेदेखि सञ्चालन हुने परीक्षामा ५ लाख १० हजार परीक्षार्थी सामेल हुने भएका छन् ।

यो बर्षको एसईई परीक्षाको नतिजा १ महिनाभित्रै प्रकाशित गर्ने तयारी छ । प्रधानमन्त्री बालेन्द्र शाहले १५ दिनभित्र परीक्षाफल प्रकाशित गर्न निर्देशन दिनुभएतापनि व्यस्त कार्यतालिका र प्राविधिक कारणले १५ दिनमा सम्भव नहुने भएपछि एक महिनाभित्र प्रकाशित गर्ने तयारी भएको हो ।

राष्ट्रिय परीक्षा बोर्डले ४५ दिनभित्र परीक्षाफल प्रकाशित गर्नेगरी शिक्षा, विज्ञान तथा प्रविधि मन्त्रालयमा तालिका बुझाएको थियो ।

स्रोतका अनुसार बोर्डले बुझाएको कार्यतालिका तालिका लिएर मन्त्री सस्मित पोखरेलले प्रधानमन्त्री शाहसँग परामर्श गरेका थिए । प्रधानमन्त्री शाहले सकेसम्म चाँडै परीक्षाफल प्रकाशित गर्न निर्देशन दिएपछि बोर्डले एक महिनामै परीक्षाफल प्रकाशित गर्न गृहकार्य सुरु गरेको छ ।

बोर्डले परीक्षा सकेलगत्तै सोही परीक्षा केन्द्रबाट परीक्षण गरेको उत्तरपुस्तिका बोर्डलाई बुझाउनुपर्नेछ । अर्थात् केन्द्रमा सबै परीक्षा सकेको भोलिपल्ट सबै विषयको उत्तरपुस्तिका केन्द्रमा बुझाउनुपर्नेछ ।

उच्चस्रोतका अनुसार हिजो बसेको बोर्डको बैठकले उत्तरपुस्तिका परीक्षणसम्बन्धी कार्यविधि तयार गरी छलफल गरेको छ । सम्भवतः केही हेरफेर नभएदेखि एक दुई दिनमा कार्यविधि पारित भई लागू हुने र कार्यविधिमा केन्द्रमै उत्तरपुस्तिका परीक्षण गर्ने व्यवस्था हुने स्रोतले बतायो ।

आफ्नै विद्यालयका विद्यार्थीको उत्तरपुस्तिका परीक्षण गर्न नमिल्ने विषय कार्यविधिमा लेखिएको छ । परीक्षामा केन्द्राध्यक्षले कसलाई उत्तरपुस्तिका परीक्षण गर्ने जिम्मा दिने त्यस विषयमा निर्णय गर्नेछन् ।

केन्द्रका सम्बन्धित विद्यालयका निरीक्षकले फरक विद्यालयको उत्तरपुस्तिका परीक्षण गर्ने व्यवस्था कार्यविधिमा उल्लेख छ । कार्यविधिको मस्यौदामा परीक्षा सकिएपछि नम्बर इन्ट्री, स्क्रुटिङ र सम्परीक्षण गर्नेसम्म सबै काम सकेर बोर्डले परीक्षाफल प्रकाशित गर्न मिल्नेगरी नम्बर पठाउनुपर्नेछ ।

एसईई परीक्षा सुरु हुनु एक दिनअघि कार्यविधि परिवर्तन भएको छ ।