यो बर्षको एसईईका लागि आवेदन फाराम खुला, मंसिर १६ भित्र बुझाउनुपर्ने

काठमाडौं । यो बर्षको एसईई परीक्षाका लागि आवेदन फाराम भर्ने प्रक्रिया सुरु भएको छ । राष्ट्रिय परीक्षा बोर्ड परीक्षा नियन्त्रण कार्यालय (कक्षा १०) सानोठिमी, भक्तपुरले आगामी माध्यमिक शिक्षा परीक्षा (एसईई) २०८२ का लागि आवेदन फाराम भर्ने प्रक्रिया सुरु गरेको हो ।

बोर्डका अनुसार शैक्षिक सत्र २०८२ मा कक्षा १० मा अध्ययनरत नियमित विद्यार्थीहरूले कात्तिक १७ गतेदेखि मंसिर १६ गतेभित्र आवेदन फाराम भरी परीक्षा दस्तुरसहित सम्बन्धित विद्यालयमा बुझाउनुपर्नेछ ।

विद्यार्थीहरूले प्रतिव्यक्ति पाँच सय रुपैयाँ परीक्षा दस्तुर बुझाउनुपर्नेछ । सोही अवधिभित्र विद्यालयहरूले संकलित फारामहरू शिक्षा विकास निर्देशनालय, शिक्षा विकास तथा समन्वय इकाई, स्थानीय तहका शिक्षा शाखा वा महाशाखामार्फत पठाउनुपर्ने व्यवस्था गरिएको छ ।

बोर्डले साधारण, परम्परागत र प्राविधिक धारका विद्यार्थीका लागि रजिष्ट्रेसन अर्धकट्टी, कक्षा ८ उत्तीर्ण प्रमाणपत्र, प्रमाणित जन्मदर्ता प्रमाणपत्र र विद्यालय पोसाकमा खिचिएको दुई प्रति पासपोर्ट साइज फोटो टाँसी फाराम बुझाउन निर्देशन दिएको छ ।

त्यस्तै, खुला, वैकल्पिक र अनौपचारिक प्रौढ विद्यालयका विद्यार्थीहरूले सम्बन्धित निर्देशिकाअनुसार आवश्यक सिफारिस र प्रमाणपत्र संलग्न गर्नुपर्ने बोर्डले जनाएको छ ।
खुला तथा वैकल्पिक कार्यक्रमअन्तर्गत कक्षा ८ वा सो सरहको परीक्षा दुई वर्षअघि पास गरेका विद्यार्थी मात्र सहभागी हुन पाउने व्यवस्था छ ।

अनौपचारिक विद्यालयका विद्यार्थीका हकमा विद्यालयको अनुमति पत्र र अन्य प्रमाणिकरण कागजात समन्वय इकाईमार्फत एकिन गर्नुपर्ने सूचनामा उल्लेख गरिएको छ ।
राष्ट्रिय परीक्षा बोर्डले सबै विद्यालय र विद्यार्थीहरूलाई तोकिएको म्यादभित्र फाराम भर्ने प्रक्रिया पूरा गर्न आग्रह गरेको छ ।