सन्तुलित आर्थिक मोडेल अवलम्बन गर्न सरकारलाई बाबुराम भट्टराईको सुझाव

काठमाडौँ । पूर्वप्रधानमन्त्री बाबुराम भट्टराईले मुलुकको आर्थिक अवस्थालाई सुधारतर्फ उन्मुख बनाउन नेपालको वास्तविकता अनुकूल नीति तथा मोडेल अपनाउनुपर्ने धारणा व्यक्त गरेका छन्।

उनका अनुसार देशको अर्थतन्त्र अझै पनि निर्वाहमुखी संरचनाबाट पूर्ण रूपमा व्यावसायिक स्वरूपमा रूपान्तरण हुन सकेको छैन। पछिल्ला केही दशकयता व्यापारिक गतिविधि विस्तार भए पनि त्यसले अपेक्षित रूपमा दिगो आधार निर्माण गर्न नसकेको उनले उल्लेख गरेका छन्।

अर्थतन्त्रको वर्तमान प्रकृतिबारे टिप्पणी गर्दै उनले श्रम निर्यातमा निर्भरता र वस्तु तथा सेवाको आयातमुखी प्रवृत्तिले प्रणालीलाई बाह्य प्रभावमा बढी आश्रित बनाएको बताए।

देश अझै प्रारम्भिक तथा संक्रमणकालीन चरणमा रहेको सन्दर्भ उल्लेख गर्दै उनले नीति निर्माण तह, निजी क्षेत्र र नागरिक समाजबीच स्पष्ट दृष्टिकोणसहित अघि बढ्नुपर्ने आवश्यकता औँल्याए। स्पष्ट नीतिगत मार्गदर्शन अभावमा आर्थिक गतिविधि अनिश्चित दिशातर्फ मोडिन सक्ने जोखिम रहेको उनको भनाइ थियो।

भट्टराईले पूर्ण सरकारी नियन्त्रण वा पूर्ण बजार स्वतन्त्रता दुवै चरम विकल्प व्यवहारिक नहुने उल्लेख गर्दै राज्य, बजार र समुदायबीच समन्वय र सन्तुलन कायम गर्ने मिश्रित ढाँचाको आवश्यकता औँल्याएका छन्।