बीबीसीको डकुमेन्ट्रीबारे पूर्वआईजीपी खापुङको प्रष्टोक्ति–मिडिया ट्रायल हो, ‘कन्टेन्ट’ मा केही छैन

काठमाडौं । बीबीसी नेपाली सेवाले चुनावको सम्मुखमा जेनजी आन्दोलनसँग सम्बन्धित रहेर तयार पारेको डकुमेन्ट्रीलाई पूर्व प्रहरी महानिरीक्षक (आईजीपी) चन्द्रकुवेर खापुङले ‘मिडिया ट्रायल’ को संज्ञा दिएका छन् । गएको भदौ २३ र २४ गतेको जेनजी आन्दोलनको बारेमा चुनावको सम्मुखमा आएर बीबीसी नेपाली सेवाले भिडियो बनाएपछि त्यसका बारेमा क्रिया–प्रतिक्रिया आइरहेका छन् ।

पूर्वआईजीपी अनलाइनसँग अन्तर्वार्ता दिंदै उनले डकुमेन्ट्रीमा प्रस्तुत भएका प्रहरीका संवाद र कलसाइनहरु हुबहु नहुनसक्ने दावी गरेका छन् । नेपाल प्रहरीको सञ्चार सेटको टावर, डाटा अद्यावधिक र भण्डारण अत्यन्तै संवेदनशील विषय भएको र ती कुरा जोकसैलाई प्रहरीले उपलब्ध नगराउने उनको भनाइ छ । खापुङ कात्तिक २७ गते नेपाल प्रहरी सेवाबाट अनिवार्य अवकास भएका थिए ।

बीबीसीको डकुमेन्ट्रीबारे के भन्नुहुन्छ ? भन्ने प्रश्नमा आईजीपी खापुङले भनेका छन्–‘यो ‘मिडिया ट्रायल’ हो । चुनावको मुखमा निकालेका छन् । त्यसैले यो ‘कन्टेन्ट’ (विषयबस्तु) मा भन्दा पनि ‘टपिक’ (शीर्षक) मा खेलिरहेका छन् । ‘कन्टेन्ट’ मा खासै केही छैन ।

कफ्र्यु लागिसकेपछि गोली हान्ने आदेश दिनुभएको हो कि होइन भन्ने अर्को प्रश्नमा तत्कालिन आईजीपी खापुङले ‘कफ्र्यु आदेश जारी भएपछि ‘आवश्यकता अनुसार गर’ भनेको छ । गोली हान भनेको त छैन नि । पुलिस मर्न आँट्यो, ज्यान जान आँट्यो, आगो लागिसक्यो के गर्ने भनेर कराइराख्दा कफ्र्यु आदेश जारी भएपछिको अवस्थामा कानून बमोजिम गर्ने हो । फिल्डको ‘सिचुएसन’ (परिस्थिति) हेरेर आवश्यकताअनुसार गर्ने हो ।’ भन्दै उत्तर दिएका छन् ।

तत्कालीन आईजीपी खापुङले जेनजी, रास्वपाहरुको ‘फेबर’ मा निर्वाचन परिणाम जाओस् भनेर पनि भिडियो सार्वजनिक गरेको हुनसक्ने हुनसक्ने बताएका छन् ।