एमाले छाड्ने क्रम बढेपछि नेता–कार्यकर्तालाई योगेश भट्टराईको आग्रह : धैर्यता अपनाऔं

काठमाडौं । पूर्वसांसद बासुदेव घिमिरेले पार्टी त्यागेपछि एमालेमा तरंग पैदा गरेको छ । तिलोत्तमा नगरपालिकाको मेयर हुँदा राम्रो काम गरेर चर्चामा आएका पूर्वसांसद घिमिरेले मंगलबार एमाले परित्याग गरेको घोषणा गरेपछि एमाले पंक्ति तरंगित भएको हो ।

जनाधार भएका घिमिरेजस्ता नेताहरु एकपछि अर्को गरी अलग हुन थालेपछि एमालेका उपमहासचिव योगेश भट्टराईले वर्तमान अवस्था इतिहासकै कठिन घडी भएकाले सबै पार्टी पंक्तिलाई धैर्यता अपनाउन आग्रह गरेका छन् । पार्टीका नेता–कायृकर्तालाई विचलित नहुन र आफ्नोतर्फबाट पार्टी एकताका पक्षमा भूमिका निर्वाह गर्न उनले अनुरोध गरेका छन् ।

एमालेको ११ औ महाधिवेशनमा पार्टीको बहुआयामिक पुनर्गठन र नेतृत्व हस्तान्तरणको बिषय अघि सारेको र उक्त प्रस्तावले नेपालको राजनीतिक वृत्त, संचारजगत, वुद्धिजीवी तथा आमजनसमुदायको प्रयाप्त ध्यानाकर्षण भएको उल्लेख गर्दै आगामी दिनमा पनि यो बहस निरन्तर जारी रहने भट्टराईको भनाइ छ ।

सामाजिक संजालमा भट्टराईले लेखेका छन्–‘ यतिबेला नेपाल राष्ट्र, नेपाली जनता, लोकतन्त्र, संविधान, राजनीतिक दल र स्वयं हामी व्यक्तिहरू पनि इतिहासकै कठिन क्षणबाट गुज्रिरहेको अवस्था छ । यो बेला हामीले गम्भीर समीक्षा गरी सही निकास दिनुपर्नेछ । यसका लागि धैर्यता अनिवार्य छ ।

हामीले उपरोक्त कार्यभार पूरा गर्न नेकपा (एमाले) को ११ औ महाधिवेशनमा पार्टीको बहुआयामिक पुनर्गठन र नेतृत्व हस्तान्तरणको बिषय अघि सारेका थियौं । हाम्रो प्रस्तावले नेपालको राजनीतिक वृत्त, संचारजगत, वुद्धिजीवी तथा आमजनसमुदायको प्रयाप्त ध्यानाकर्षण भएको छ । आगामी दिनमा पनि यो बहस निरन्तर जारी रहनेछ ।

हामीले पार्टीको अन्तरसंघर्षमा आश र त्रासबाट मुक्त भएर यो जोखिम उठाएका हौं ।

म पार्टीका सम्पूर्ण कमरेडहरूलाई विचलित नहुन र आफ्नोतर्फबाट पार्टी एकताका पक्षमा भूमिका निर्वाह गर्न अनुरोध गर्दछु ।

हामीले उठाएका मुद्दाले जनताको दिलबाट समर्थन प्राप्त गरेको छ र निकट भविष्यमै पार्टीपंक्तिबाट पनि अनुमोदन हुनेछन् ।’