अदालतको अवहेलना गर्दै पूर्वमन्त्री प्रकाशमान सिंहका छोराहरू, गणेशमानकै प्रतिष्ठामा आघात

काठमाडौं । २०४६ को परिवर्तनलगत्तै प्रधानमन्त्रीको प्रस्ताव आए पनि त्याग गरेपछि नेपाली कांग्रेसका सर्वोच्च नेता गणेशमान सिंहको उचाई एकाएक बढ्यो । तर, तिनै सर्वोच्च नेताका नाति तथा पूर्वउपप्रधानमन्त्री प्रकाशमान सिंहका पुत्रद्वय प्रभाशमान सिंह र भाष्करमान सिंहले आफन्त तथा छिमेकीलाई धाक धम्की दिई तोडफोड गरेर अदालतको अन्तरिम आदेशको अवहेलना गरेका छन् । उनीहरुले ‘नेपो बेबीको मनोवृत्ति’ देखाएपछि आफ्ना बाजेको नाम बद्नाम गरिरहेका हुन् ।

उनीहरुको ताण्डव सहन नसकेर उच्च अदालत पाटनमा छिमेकी तथा आफन्तले दायर गरेको रीट निवेदनमा कित्ता नम्बर १२१६ को उक्त घर जग्गामा जे जस्तो अवस्थामा छ सोही अवस्थामा राख्नु, भएको संरचना तोडफोड गर्ने, भत्काउने, निवेदकको इज्जत प्रतिष्ठामा आघात पुर्‍याउने एवं धाकधम्की दिने कार्य नगर्नू नगराउनू भन्ने आदेश जारी भएको थियो ।

सोमबारको डायरी एक्सप्रेस साप्ताहिकमा समाचार छ–अदालतको आदेशबिपरीत राजनीतिक प्रभावको आडमा कानून हातमा लिएर काठमाडौं महानगरको नगर प्रहरी, काग्रेसबाट निर्वाचित वडाध्यक्ष र सदस्यहरु बोलाएर थप दुःख दिने, हुलहुज्जत गर्ने अदालतको आदेश मान्दैनौं भन्दै हप्कीदप्की र धाकधम्की दिने कार्य जारी नै राखेका छन् । उनीहरुले अदालतलाई ठाडो चुनौती दिए पनि प्रशासनबाट कहीँ कतै सुनुवाइ भएको छैन ।

घटनाको सुरुवात कसरी भयो ?

नेपाली कांग्रेसका लौहपुरुष गणेशमान सिंह र भाइ शंकरमान सिंहकी आमा शुभद्रा कुमारी श्रेष्ठ (सानुनानी श्रेष्ठ) ले वि.स. २००८ सालमा ४५ हजार रुपैयाँमा राणा प्रधानमन्त्री श्री ३ महाराज जुद्धशम्शेरका छोरा बहादुरशम्शेर जवरासँग १४ रोपनी जग्गा चाक्सीबारीमा लिएकी थिइन् ।

यो जग्गाको अंशबण्डा गणेशमान र शंकरमानको श्रीमती नारायणीदेवीबीच वि.स.२०४० सालमा गरिएको थियो । चाक्सीबारीको घर पनि आधा आधा गरियो । नारायणीदेवीले आफ्नो घरतर्फ पूरै पर्खाल लगाइन् ।

शंकरमान र नारायणीदेवीका तीन छोराहरु क्रमशः त्रैलोक्यमान, महेन्द्रमान र बिभूतिमान हुन् । यिनीहरुमध्येका जेठा दाजु त्रैलोक्यमानको डिलाइट सिंह राणासँग विवाह भयोे । डिलाइट विवाह गरेर एक बर्षमात्रै घर बसिन् । त्यसपछि उनी माइतीमा बस्न लागिन् ।

यसरी विवाह गरेको २० बर्षपछि अर्थात २०६४ सालमा त्रैलोक्यमानको निधन भयो । त्यसपछि डिलाइट राणा सम्पत्तिको लोभले घर आइन् । उनको सम्पत्ति पुख्र्यौली भएकाले भाइहरु महेन्द्रमान र बिभूतिमानले चलनचल्तीको मोलमा खरिद गर्ने भनेर बर्षौंदेखि अनुरोध गर्दै आएपनि डिलाइट राणाले भित्री साँठगाँठ गरी प्रकाशमानका दुई छोरालाई सुटुक्क बेचिदिइन् ।

यो विषय पत्ता लगाएपछि मालपोत कार्यालय डिल्लीबजारमा गएर उक्त जग्गा निखन्नका लागि उनीहरु दुई दाजुभाइको तर्फबाट खरिद गरेका मूल्य ४ करोड ८० लाख रुपैयाँ धरौटी राखियो । अहिले अर्धन्यायिक निकाय भूमिसुधार तथा मालपोत कार्यालय डिल्लीबजारमा जग्गा रोक्का राखी मुद्दा चलिरहेको छ ।

यही अवस्थामा नगरप्रहरीको पहुँच देखाएर उनीहरुले उक्त ७ आना ३ पैसा २ दाम जग्गा र सोही ठाउँमा बनेको घर तोडफोड गर्ने प्रयास गरे । मंसिर २५ गते अदालतको आदेश अवहेलना गर्दै भाष्करमान सिंह र प्रभाशमान सिंहले पुनः हतियार प्रयोग गरी घर तोडफोड गरे, ताला फुटाएका छन् । यसरी मंसिर २५ गते भित्ताहरु फोडिएको थियो । त्यसपछि २८ गते उक्त घरको ढोका नै फोडियो । जुन भिडियोमा पनि प्रष्ट देख्न सकिन्छ ।

अदालतको आदेशबिपरीत घर तोडफोड गर्दै प्रभाशमान र भाष्करमानका मानिस

काठमाडौं महानगरपालिकाका नगरप्रहरीलाई निषेधाज्ञाको पत्र देखाउँदा पनि एकातर्फी रुपमा महेन्द्रमान र विभूतिमानका परिवारसामु प्रस्तुत भए । यसरी उनीहरु कहाँबाट आएको हो ? नाम के हो ? भन्ने जानकारीसमेत नदिएर गुण्डागर्दीकै शैलीमा बृद्ध महेन्द्रमान र बिभूतिमानका परिवारसामु गुण्डागर्दीकै शैलीमा प्रस्तुत भएका थिए । उनीहरुले अदालतको आदेश हामी मान्दैनौं भन्दै ठाडो चुनौती दिएको गुनासो महेन्द्रमानहरुको छ ।

त्यसपछि यो विषयमा महेन्द्रमान सिंहको परिवार अदालतमा अवहेलनाको रिट निवेदन लिएर जान बाध्य भयो । पुस २ गते प्रकाशमानका छोराहरुलाई उच्च अदालत पाटनकोे अवहेलनाको पत्र तामेलदारले बुझाएका छन् । पूर्व उपप्रधानमन्त्री प्रकाशमान सिंहका छोराहरुले यो हदसम्मको ब्यवहार नगरेको भए राम्रो हुने चाक्सीबारीका स्थानीयहरुले यस प्रतिनिधिलाई बताएका छन् ।

यस घटनामा निवर्तमान उपप्रधान तथा शहरी मन्त्री विकास मन्त्री प्रकाशमान सिंहका छोरा प्रभाशमान सिंहसँग सम्पर्क गर्दा उनले अदालतको अवहेलना बारेमा थाहै नभएको प्रतिक्रिया दिए ।

उच्च अदालतको आदेश, जुन आदेश प्रकाशमान सिंहका छोराहरुले अवज्ञा गरेका छन्