अमेरिकाबासी नेपालीको सरकारसँग गुहार, छिटो स्वदेश फर्कने ब्यवस्था होस्

 काठमाडौं, १५ बैशाख ।

कोरोना भाइरस(कोभिड–१९) को महामारीका कारण सबैभन्दा बढी मानवीय क्षति अमेरिकामा भएको छ । अमेरिकामा आजका मितिसम्म ९ लाख ८७ हजार ३ सय २२ संक्रमित भएका छन् । त्यसमा मृत्यु हुनेको संख्या ५५ हजार ४ सय १५ छ । निको भएर फर्किनेको संख्या १ लाख १८ हजार ७ सय ८१ छ । अमेरिकामा कोरोना डढेलोसरी फैलिरहेको छ । अमेरिकामा एकै दिनमा २६ हजार ४ सय २६ नयाँ संक्रमित थपिएका छन् । अमेरिकामा कोरोना संक्रमणबाट आइतबार एकै दिनमा १ हजार १ सय ५० को मृत्यु भएको छ ।

 अमेरिकामा डढेलोसरी फैलिएको कोरोना संक्रमणबाट नेपालीहरु त्रसित छन् । केही महिनाका लागि घुम्न गएका, पढ्न गएका तर पैसा सकिएकाहरु नेपाल फर्कन चाहन्छन् । नेपालमा कोरोना संक्रमण नफैलिएकाले सुरक्षित हुने देखेर स्थायी बसोबास गर्नेहरु पनि फर्किन पाए बाँचिन्थ्यो कि भन्ने आशामा छन् । आफन्तले बोलाएर केही महिना अमेरिका घुम्न गएकाहरु पनि फसेका छन् । यसरी फसेकामध्येकै हुन्, अभिभावक महासंघ नेपालका अध्यक्ष सुप्रभात भण्डारी । उनका अनुसार अमेरिकामा घुम्न गएका, पढ्न गएका तर पैसा सकिएकाहरु स्वदेश फर्किन चाहिरहेका छन् । यसरी घुम्न गएकामध्ये नेपाल सरकारका वर्तमान र पूर्व उच्च प्रशासकहरु पनि छन् । स्थायी बसोबास गर्ने अनुमति पाएकाहरु पनि नेपालमा सुरक्षित हुने देखेर फर्कनका लागि प्रयासरत छन् ।

नेपाल फर्किनका लागि सबै खर्च आफंैले ब्यहोर्न तयार भएकाहरु २ सय ८४ जनाको नामावली संकलन भइसकेको भण्डारीले जानकारी दिए  । अमेरिकाका टेक्सास, भर्जिनियाँ, न्यूयोर्क लगायतका सहरमा मात्र संकलन भएको नाम हो यो । नेपालीहरुका संघसंस्थाले नेपाली राहदानीबाहकलाई सरकारले स्वदेश फर्काउन पहल गर्नुपर्ने पक्षमा अमेरिकास्थित नेपाली दूताबासमा समेत पटक पटक ध्यानाकर्षण गराइरहेका छन् । नेपाली मूलका स्थायी नागरिक जो फर्कन चाहन्छन्, उनीहरुलाई समेत फर्काउनुपर्नेमा पासपोर्ट बाहकलाई समेत फर्काउन नेपालबाट पहल हुन नसकेको गुनासो अमेरिकामा त्रासमा बाँचिरहेका नेपालीको छ । 

 घुम्न गएकाहरुमध्ये अधिकांश सुगर, प्रेसर जस्ता रोग लागेर नियमित औषधि सेवन गर्नेहरु पनि छन् । उनीहरुले नेपालबाट लगेको औषधि सकिसकेको छ । अमेरिकामा औषधि धेरै महंगो भएकाले पनि उनीहरु नेपाल फर्किन आतुर छन् । नेपालमा २ सय रुपैयाँ पर्ने औषधि अमेरिकामा २ सय डलर नै मूल्य पर्छ । अमेरिकाबाट नेपाल फर्किनेहरुलाई जहाजमा आउन दिनुपर्ने आवाज एनआरएन अमेरिकाले पनि उठाउँदैआएको छ । स्वदेश फर्किएपछि क्वारेन्टाइन बस्नेदेखि सबै प्रक्रिया पूरा गराउनेगरी फर्काउनका लागि सरकारले पहल लिनुपर्ने अमेरिकाका नेपालीहरुको छ ।   

अमेरिकामा जहाज चलिरहेका छन् । जहाज भाडा सरकारले खर्च गर्नुपर्दैन, आफैं ब्यहोर्न तयार छौं भनिरहेको बेला सरकारले नेपालीलाई स्वदेश आउन अनुमति दिनुपर्ने, रोक्नु नहुने भण्डारी बताउँछन् ।