ओलीलाई विस्थापित गर्न अष्टलक्ष्मीसहितका नेताहरुलाई महेश बस्नेतको चुनौती

काठमाडौं । एमालेका नेता महेश बस्नेतले पार्टीका उपाध्यक्ष अष्टलक्ष्मी शाक्यसहितका नेताहरुलाई केपी शर्मा ओलीलाई अध्यक्षबाट बिस्थापित गर्न चुनौती दिएका छन् ।

एमाले अध्यक्ष ओलीलाई लिएर चुनावमा जान सकिंदैन भन्ने उपाध्यक्ष शाक्यको अभिब्यक्तिको जवाफमा बस्नेतले ओलीलाई महाधिवेशनमा पराजीत गर्न चुनौती दिएका छन् ।

एमालेभित्र अहिले एउटा प्रश्न जबर्जस्त उब्जिएको उल्लेख गर्दै उनले प्रश्न गरेका छन्–‘आगामी निर्वाचनमा केपी शर्मा ओलीको व्यक्तित्व पार्टीका लागि उपयुक्त हो कि, अष्टलक्ष्मी शाक्य, विद्या भण्डारी, युवराज ज्ञवाली, ईश्वर पोखरेल वा योगेश भट्टराईको अनुहार लिएर अघि बढ्दा राम्रो होला ?’

सामाजिक संजालमा बिहीबार बिहान बस्नेतले लेखेका छन्–अष्टलक्ष्मी शाक्यले भन्नुभएछ केपी ओलीले लिएर चुनावमा जान सकिँदैन !

एमालेभित्र अहिले एउटा प्रश्न जबर्जस्त उब्जिएको छ !

आगामी निर्वाचनमा केपी शर्मा ओलीको व्यक्तित्व पार्टीका लागि उपयुक्त हो कि, अष्टलक्ष्मी शाक्य, विद्या भण्डारी, युवराज ज्ञवाली, ईश्वर पोखरेल वा योगेश भट्टराईको अनुहार लिएर अघि बढ्दा राम्रो होला ?

आगामी मङ्सिर २७, २८, २९ गते पोखरामा हुने महाधिवेशनले अवश्य नै छिनोफानो गर्नेछ ।

सो अधिवेशनमा आफ्नो वैकल्पिक क्षमता देखाउन नसक्ने, खाली नेतृत्वको विरोध गर्ने यो पंक्तिका नेताहरूको हैसियत के हुने हो अवश्य देखिनेछ ?

पार्टीभित्र उहाँहरूले खेलिरहनुभएको भूमिका सधैं प्रभावकारी र सकारात्मक थियो, कि भित्रभित्र गुटबन्दी र गलत भूमिका खेल्दै सर्पझैं मौन रहँदै अवसर कुरिरहनुभएको मात्र हो ?

अब परिस्थिति प्रतिकूल बनेको बेला यही मौका हो भनेर अध्यक्ष केपी शर्मा ओलीलाई विस्थापित गर्ने पार्टी बदनाम गराउने र आफ्ना लाभका प्राप्तितर्फ लाग्ने कराउन थालेका हुन् कि त ?

आम कार्यकर्ताले विवेकपूर्ण फैसला गर्ने समय आएको छ ।