ठगी गरेपछि अदालतले थुन्छ, रास्वपाको हस्ताक्षर कीर्ते हो : प्रधानमन्त्री ओली

काठमाडौं । प्रधानमन्त्री केपी शर्मा ओलीले राष्ट्रिय स्वतन्त्र पार्टीका सभापति रवि लामिछाने थुनामा पर्नुमा सरकारको कुनै हात नरहेको बताएका छन् । कैलालीमा मंगलबार रानीजमरा कुलरिया सिँचाइ आयोजना उदघाटन कार्यक्रममा बोल्दै उनले लामिछानेमाथि सरकारले प्रतिशोध लिएको भन्ने आरोप निराधार रहेको दाबी गरेका छन् ।

‘अपराध गरेर सरकारलाई गाली गर्नेहरु सरकार अदालत होइन । अदालतले थुन्छ वा छोड्छ, त्यो सरकारको हातमा हुँदैन । ठगी गरेपछि अदालतले थुन्छ, गलत काम गर्दा आँखा नदेख्ने, अनि पछि प्रतिशोध भन्ने ?’ ओलीले भने ।

सहकारी ठगी प्रकरणमा रुपन्देही कारागारमा थुनामा रहेका लामिछानेप्रति संकेत गर्दैै ओलीले भने आफूले कुनै प्रतिशोध राखेको छैन । ‘मैले नै रविलाई गृहमन्त्री बनाएँ, राजनीतिमा ल्याएँ । कस्तो प्रतिशोध ?’

रास्वपाले लामिछानेको पक्षमा चलाएको हस्ताक्षर अभियानप्रति टिप्पणी गर्दै उनले भने भने–‘असभ्य ढङ्गले बोल्ने, तथाकथित हस्ताक्षर अभियान मलाई त डर लाग्छ, कतै तीन करोड नाघ्ला कि ! हस्ताक्षर कीर्ते हो, दुई–चार जनाले सही गरेर लाखौँ भन्छन् ।’

रवि लामिछानेले दिएको काठमाडौंको जेलमा सार्ने निवेदनलाई पनि अस्वीकार गर्र्दैआएको छ ।