विद्यालाई रोक्ने मध्यरातको निर्णयले एमालेमा भूकम्प

काठमाडौं । दुई दिनसम्म चलेको नेकपा एमालेको केन्द्रीय कमिटी बैठक पूर्वराष्ट्रपति विद्यादेवी भण्डारीको पार्टी सदस्यता नवीकरण नगर्ने निर्णय गर्दै मंगलबार मध्यरातमा समापन भएको छ ।
बैठकले पूर्वराष्ट्रपति विद्यादेवी भण्डारीलाई पार्टी राजनीतिमा नफर्कन आग्रह गर्ने निर्णय गरेको छ ।

बैठकले पदीय गरिमा अनुरूप पूर्वराष्ट्रपतिको हैसियतमा सल्लाहकार र अभिभावक बनेर बस्न आग्रह गर्ने निर्णय गरेको छ । पार्टी अध्यक्ष केपी शर्मा ओलीले पूर्वराष्ट्रपति भण्डारीको सदस्यता नवीकरण गर्न नसकिने र राजनीतिमा फर्कन नदिने निर्णय सुनाएका थिए ।

पूर्वराष्ट्रपति भण्डारीले मंगलबार दिउँसो पत्रकारहरुसँग म सक्रिय राजनीतिमा आइसकेँ, पछि हट्ने कुरा हुँदैन भन्ने अभिब्यक्ति दिएकी थिइन् । तर मंगलबार राति नै पार्टी अध्यक्ष ओलीले भण्डारीको सदस्यता नवीकरण नगर्ने निर्णय गरेर उनलाई एमालेमा फर्किने र अध्यक्ष हुने चाहनामा रोक लगाइदिएका छन् । भण्डारीले राष्ट्रपतिको भूमिकामा पठाउन खोज्दा परिवार र बहुसंख्यक कार्यकर्ताले सेरोमेनियल भूमिकामा नजान सुझाव दिंदादिंदै पनि पार्टीले दिएको जिम्मेवारी निर्वाह गरृेको उनले बताएकी थिइन् ।

पार्टी बिधानमा अध्यक्षको कार्यकाल २ बर्ष र ७० बर्ष उमेर हदको ब्यवस्था आफू र ओलीले नै ल्याएको बताइन् । पार्टी बिधानमा भएको त्यो दुबै प्रावधान हटाउन उहाँ(प्रधानमन्त्री) नै लागेको, पार्टीमा कोही पनि उहाँको बिरुद्ध अध्यक्षमा उम्मेदवार हुन तयार नभएकाले पनि आफूले एमालेको नेतृत्वमा आउन चाहेको बताएकी थिइन् । भण्डारीको सदस्यता नवीकरण नगर्ने पार्टीको निर्णयको बिपक्षमा बरिष्ठ उपाध्यक्ष इश्वर पोखरेल, उपाध्यक्षद्वय सुरेन्द्र पाण्डे र युवराज ज्ञवालीले मात्र बिरोध गरेका थिए ।

एमाले अध्यक्ष केपी शर्मा ओलीले नेकपाा बनिसकेपछि पुष्पकमल दाहाल ‘प्रचण्ड’, माधव नेपाल, झलनाथ खनाल, भीमबहादुर रावल, वाामदेव गौतमलाई पनि पन्छाएका थिए । अहिले आएर आफ्नो गुट बनाउन हरतरहले सहयोग गर्ने र सधैं अप्ठेरो परिस्थितिमा साथ दिंदैआएकी पूर्वराष्ट्रपति भण्डारीलाई समेत ओलीले पार्टी सदस्यता नै नवीकरण नगर्ने निर्णय गरेर धोकाधडीको उच्चतम रुप प्रकट गरेका छन् ।

भण्डारीको सदस्यता नवीकरण नगर्ने निर्णयले एमालेको जीवनमा धेरै असर गर्ने संभावना छ । एक बर्षदेखि सरकारको नेतृत्व गरिरहेका ओलीको जनस्तरमा चर्को आलोचन हुँदैआएको छ । सुशासनको अभावका कारण उनको लोकप्रियताको ग्राफ निकै आरोलोमा पुगिसकेको छ । दुई ठूला दलको सरकार भए पनि जनतामा आशा जगाउन नसकेको बेला भण्डारीलाई एमालेमा आउनबाट रोकपछि आगामी २०८४ को निर्वाचनमा एमालेलाई निकै हानी पुग्ने आंकलन गरिएको छ ।