गोरखामा सांसद-नागरिक गुनासो ब्यवस्थापन सिविर सम्पन्न

गोरखा । गोरखा निर्वाचन क्षेत्र नम्बर २ का प्रतिनिधिसभा सदस्य तथा राष्ट्रिय स्वतन्त्र पार्टीका संसदीय दलका मुख्य सचेतक कविन्द्र बुर्लाकोटीले नागरिकका समस्या, गुनासा र सुझाव प्रत्यक्ष रूपमा सुन्ने उद्देश्यले सांसद – नागरिक गुनासो व्यवस्थापन शिविर सम्पन्न गरेका छन्।

जनप्रतिनिधि स्वयं नागरिकको बीचमा पुगेर उनीहरूका समस्या सुन्ने, अभिलेखीकरण गर्ने र समाधानका लागि पहल गर्ने उद्देश्यले आयोजित शिविरलाई गोरखाका नागरिकले नयाँ र नमुना अभ्यासका रूपमा स्वागत गरेका छन्।

शिविरमा नागरिकले स्थानीय विकास निर्माणदेखि सार्वजनिक सेवा प्रवाहसम्मका विभिन्न विषयमा आफ्ना गुनासा तथा सुझाव राखेका थिए। विशेषगरी सडक, पुल तथा यातायात पूर्वाधार निर्माणमा भएको ढिलासुस्ती, त्यसले जनजीवनमा पारेको प्रभाव, कृषि तथा पशुपालन, खानेपानी, स्वास्थ्य, ऊर्जा, शिक्षा, प्रशासनिक सेवा प्रवाहमा देखिएका समस्या र कर्मचारी तथा प्रशासनिक प्रक्रियाका कारण नागरिकले भोग्नुपरेका कठिनाइबारे गुनासा प्राप्त भएका थिए।

शिविरमा प्राप्त गुनासा तथा सुझावलाई विषयगत रूपमा वर्गीकरण गरी व्यवस्थित अभिलेखीकरण गरिएको छ। संकलित विवरणअनुसार सडक, पुल तथा यातायातसम्बन्धी १६ वटा, कृषि तथा पशुपालनसम्बन्धी ७ वटा, ऊर्जा तथा विद्युत्सम्बन्धी ४ वटा, स्वास्थ्य सेवासम्बन्धी २ वटा र संस्कृति, पर्यटन तथा धार्मिक सम्पदासम्बन्धी ४ वटा र अन्य विभिन्न विषयसँग सम्बन्धित १६ गुनासा तथा सुझावसमेत गरी कुल ५७ वटा विषय अभिलेखीकरण गरिएको जनाइएको छ।

जनताका समस्या सुन्ने औपचारिक कार्यक्रमभन्दा पनि प्राप्त गुनासालाई प्राथमिकताका आधारमा वर्गीकरण गर्ने, समाधानका लागि सम्बन्धित निकायसँग समन्वय गर्ने र कार्यान्वयनको अवस्थासमेत पछ्याउने उद्देश्यले शिविर सञ्चालन गरिएको हो।

नागरिकका दैनिक जीवनसँग प्रत्यक्ष जोडिएका समस्यालाई जनप्रतिनिधिसमक्ष पुर्‍याउन सहज बनाउने तथा जनप्रतिनिधि र नागरिकबीचको सम्बन्धलाई थप जवाफदेही र उत्तरदायी बनाउने यो अभ्यासले स्थानीय तहमा सार्वजनिक सेवा प्रवाह र विकास निर्माणका कामलाई प्रभावकारी बनाउन सहयोग पुग्ने अपेक्षा गरिएको छ।

नागरिकका गुनासा सुन्ने मात्र नभई तिनको समाधानका लागि संस्थागत पहल गर्ने अभ्यासका रूपमा यस कार्यक्रमलाई गोरखामा नयाँ संसदीय अभ्यासको सुरुवातका रूपमा हेरिएको छ।