न्याय र सत्यको लडाइँ जारी छ, जारी रहनेछ : कर्ण थापा

काठमाडौं । एमाले नेता कर्ण थापाले सत्य र न्यायको पक्षमा लडिरहने बताएका छन् । थापाले षड्यन्त्र र दाउपेचलाई घृणा गर्दै आएको बताउँदै केपी शर्मा ओलीलाई अध्यक्ष बनाउन सून्यबाटै सुरू गरेको उल्लेख गरेका छन् ।

ओलीलाई सफलताको शिखरसम्म पु¥याउन धेरैको योगदान रहेको र आफू उनको पक्षमा अविचलित साथमा रहेको कुरा पनि उल्लेख गरेका छन् । सातौं, आठौं र संसदीय दलको नेता हुने निर्वाचन प्रतिनिधि रहेको उल्लेख गर्दै सामाजिक संजालमा सत्य कुरा नबुझी बिरोध वा समर्थन नगर्न आग्रह गरेका छन् ।

पूर्वराष्ट्रपति विद्यादेवी भण्डारीलाई एमालेको अध्यक्ष बनाउनुपर्छ, ओलीलाई बिदा गर्नुपर्छ भन्दैआएका नेता थापा लेख्छन्–‘बामदेव, सीपी, आरकेहरूले माधव नेपाललाई महासचिवबाट हटाउन खोज्दा माधव जोगाउन लडियो । माधवले पार्टी शक्तिको दुरूपयोग गरी केपी, शंकर, प्रदीप, गुरु बराल, देवराज घिमिरेहरूलाई किनाराकृत र अपमान गर्दा माधवको विपक्षमा लडियो ।

कमरेड केपीलाई अध्यक्ष बनाउन सून्यबाटै सुरू गरियो । सफलताको शिखरसम्म पु¥याउन धेरैको योगदान रह्यो, म अविचलित साथमा रहे । म कमरेड केपीको सातौं, आठौं र संसदिय दलको नेता हुने निर्वाचन प्रतिनिधि रहें ।

राजा वीरेन्द्र जीवितै हुँदा म वीरेन्द्र भन्दा ६ वर्ष जेठो हुँ भन्ने अन्तर्वार्ता प्रकाशन भएपछि राजा हुन पाउने रविन्द्रको हक खोसिनु हुन्नथ्यो भनेर जनआस्था साप्ताहिकमा लेख नै लेखियो । त्यो लेख दरबारको नोटिसमा पर्यो । २०१५ सालको एसएलसी टपर प्रकाशचन्द्र लोहनी होइनन्, प्रकाशचन्द्र जोशी भन्ने तथ्यमा म उभिएको हो ।

प्रधानन्यायाधीश बिश्वनाथ उपाध्यायले एमालेलाई अपमान गर्दा उनको विरूद्वमा पनि लेखियो, मानहानीको मुद्दा भने खेप्नुपरेन । यी केही दृष्टान्तमात्रै हुन् । यस समयसम्म आइपुग्दा अनेकौं भोगाइहरू छन् ।

सत्य र न्यायको पक्षमा लडिरहने मेरो रोजाइ हो । म जे हुँ, त्यति बुझिदिए मलाई पुग्छ । षड्यन्त्र र दाउपेचलाई घृणा गर्छु । सही कुरा नबुझी, समर्थन वा विरोध नगर्न सबैमा अनुरोध छ ।’