एमालेनिकट कानुन व्यवसायीहरुको निर्वाचन, अध्यक्षमा बालुवाटारनिकट थपलिया पराजीत

काठमाडौं । नेकपा (एमाले)निकट कानुन व्यवसायीहरूको संस्था प्रगतिशील तथा पेसागत कानुन व्यवसायी संगठन (पिपिएलए) को अध्यक्षमा अमर थापा निर्वाचित भएका छन् ।

आइतबार भएको निर्वाचनमा थापा अध्यक्षमा निर्वाचित भएका हुन् । उनले २ सय ५६ मत ल्याएर निर्वाचित भएका छन् भने उनका प्रतिस्पर्धी ओमप्रसाद थपलियाले २१३ मत ल्याएका छन् । कानुन ब्यवसायभन्दा पनि राजनीतिमा सक्रिय थपलियालाई बालुवाटारले जबर्जस्ती ल्याएर अध्यक्षमा उठाए पनि उनी पराजीत भएका छन् । थापा पीपीएलका निवर्तमान महासचिव हुन् ।

खुला उपाध्यक्षमा भीमसेन बञ्जारा निर्विरोध निर्वाचित भएका थिए । महिलातर्फ भने चुनाव भएको थियो । जसमा यशोदादेवी खरेल निर्वाचित भइन् । उनले ३०५ मत ल्याइन् । प्रतिस्पर्धी हिमादेवी बस्नेतले १५२ मत ल्याइन् ।

महासचिवमा भुवनप्रसाद निरौला १ सय ६३ मत ल्याएर निर्वाचित भए । महासचिवमा शिव अर्याल पराजीत भएका छन् ।

उममहासचिवमा बाबुराम राई निर्वाचित भएका छन् भने तीन सचिवमा युवककुमार गौतम, अनिता गौतम र मुकुन्दप्रसाद अधिकारी निर्वाचित भएका छन् । मुकुन्द अधिकारी र हरिप्रसाद मैनालीको मत बराबर आएकाले गोलाप्रथाबाट छिनोफानो गरिएको थियो ।

सचिवमा राधिका खतिवडा निर्विरोध निर्वाचित भइसकेको अवस्थामा रातारात नेपाल बारको उपाध्यक्ष भइसकेकी अनिता गुरुङलाई बालुवाटारकै डिजाइनमा ल्याएर उम्मेदवारी दर्ता गर्न लगाइएको आरोप छ । खतिवडा जम्मा ५ मतले पराजीत भएकी थिइन् ।

कोषाध्यक्षमा कुमार घिमिरे २२९ मत ल्याएर निर्वाचित भएका छन् । केही सदस्यहरु भने निर्बिरोध निर्वाचित भएका छन् ।