तरुण दलको भवन निर्माणमा ३ करोड बजेटः महेश बस्नेतले गरे चर्को बिरोध

काठमाडौं । शहरी विकास मन्त्रालयले तरुण दलको भवन निर्माणका लागि ३ करोड रुपैयाँ बजेट छुट्याउने निर्णयको चौतर्फी बिरोध भइरहेको छ ।

काठमाडौं महानगरपालिका १३ नम्बर वडामा तरुण दलको भवन बनाउनका लागि आर्थिक बर्ष २०८२-०८३ को बजेटमा सहरी विकास मन्त्रालयले ३ करोड रुपैयाँ छ्ट्याएको छ ।

गणेशमान सिंह स्मृति भवन शीर्षकमा तरुण दलको भवन बनाउन बजेट छुट्याएकोमा सत्तारुढ दल एमालेका नेता महेश बस्नेतले पनि बिरोध गरेका छन् । उनले सामाजिक संजालमा राज्यकोषबाट जनताको पसिनाको कर उठाएर यसरी खुलेआम ‘दलगत लाभ’ बाँड्ने हो भने शासनप्रणाली र दलहरूमाथि समेत गम्भीर प्रश्न उठ्ने उल्लेख गरेका छन् ।

वीर गणेशमान सिंहको छोरा भएर सहरी विकास मन्त्री प्रकाशमान सिंहले उनको आदर्शको मूल्य यति सस्तो फाल्नु राम्रो होइन भन्ने सुझाव बस्नेतले दिएका छन् ।

बस्नेतले लेखेका छन्

शहरी विकास मन्त्रालयमार्फत नेपाली कांग्रेसको भातृ संगठन तरुण दललाई ३ करोड रुपैयाँ बजेट बिनियोजन भएछ ।

राज्यकोषबाट जनताको पसिनाको कर उठाएर यसरी खुलेआम “दलगत लाभ” बाँड्ने हो भने शासनप्रणाली र दलहरूमाथि समेत गम्भीर प्रश्न उठ्छ ।

वीर गणेशमान सिंहको छोरा, आफ्नै थातथलो लोकतान्त्रिक संघर्षमा, इतिहास बोक्ने नाम थर भएको व्यक्तिले

त्यो नाम र आदर्शको मूल्य यति सस्तोमा फ्याल्नु राम्रो हो त दाजु ?

शासकीय मर्यादाको यो हदको उल्लंघनले तरुणतालाई होइन, सरकारकै नैतिकतालाई खोक्रो बनाउँछ ।

सत्ता सस्तो नबनाउनु दाजु , तपाईँप्रतिको हाम्रो सम्मान नघटोस् !