ललिता निवासको जग्गा हिनामिना पत्ता लगाउने त्रिताललाई त्रिविको जग्गा खोज्ने जिम्मा

काठमाडौँ । सरकारले त्रिभुवन विश्वविद्यालयको नाममा रहेको जग्गा तथा चलअचल सम्पत्तिको खोजी गर्न पूर्वसचिव शारदाप्रसाद त्रितालको संयोजकत्वमा समिति गठन गरेको छ ।

जेठ १७ गते बसेको मन्त्रिपरिषद् बैठकले समितिको सदस्यमा पूर्वसहसचिवद्वय महेन्द्रकुमार थापा र जानकीबल्लभ अधिकारी, त्रिविका विज्ञ सदस्य प्राडा प्रेमसागर चापागाईंलाई नियुक्त गरेको सरकारकी प्रवक्ता तथा सञ्चार तथा सूचना प्रविधिमन्त्री रेखा शर्माले जानकारी दिएकी हुन् ।

समितिको सदस्यसचिव शिक्षा, विज्ञान तथा प्रविधि मन्त्रालयका उपसचिवलाई तोकिएको छ ।

समितिले त्रिविका नाममा विभिन्न ठाउँमा रहेका जग्गामध्ये प्रारम्भिक चरणमा उपत्यकाभित्रको जग्गाको अध्ययन, अनुसन्धान तथा छानबिन एवं भवनलगायत अन्य चलअचल सम्पत्तिको खोज तथा लगत सङ्कलन, संरक्षण, उपयोग, व्यवस्थापन र आवश्यक अन्य कार्यका लागि अध्ययन गरी ठोस प्रतिवेदन पेस गर्नेछ ।

पूर्व सहसचिव त्रितालले ललिता निवासको अतिक्रमित जग्गाको बारेमा अनुसन्धान गरी प्रतिवेदन दिएका थिए । जुन प्रतिवेदनका आधारमा ललिता निवासको जग्गा खोजी भएको थियो ।

अख्तियार दुरुपयोग अनुसन्धान आयोगका प्रमुख आयुक्त प्रेमकुमार राई गृहमन्त्रालयको सचिव हुँदा त्रिताल नेतृत्वमा समिति गठन गरी ललिता निवासको जग्गा खोजी गरिएको थियो । सर्वोच्च अदालतका मूर्धन्य भनिएका न्यायाधीशरु खिलराज रेग्मी, बलराम केसीहरुले समेत हचुवाका भरमा ब्यक्तिकै जग्गा भएको फैसला गरेको ललिता निवासको जग्गा सरकारी हो भन्ने तथ्यसहितको प्रतिवेदन त्रिताल समितिले दिएको थियो ।