कांग्रेस महासमिति : महामन्त्री गगनको प्रस्तावमा अझै जुटेन सहमति

काठमाडौं । सत्तारुढ दल नेपाली कांग्रेसको महासमिति बैठकका निम्ति महामन्त्री गगनकुमार थापाले तयार पारेको प्रतिवेदनमा अझै सहमति जुटेको छैन ।

महामन्त्री गगनले तयार गरेको उक्त प्रतिवेदनमा भविष्यमा हुने आवधिक निर्वाचनअघि नै गठबन्धन नगर्ने सङ्कल्प गर्नुपर्ने उल्लेख छ । उक्त प्रस्तावलाई हटाउनु पर्ने कांग्रेसको संस्थापन पक्षको माग छ ।

यसमा पार्टी सभापति शेरबहादुर देउवाले नै असन्तुष्टि जनाएका छन् । यसपछि छलफलका लागि महामन्त्री गगन आफैँ देउवा निवास बूढानीलकण्ठ पुगेका छन् ।

सभापति देउवाले असहमति जनाएपछि महामन्त्री गगनले शनिबार साँझ र आइतबार छलफल गरेका थिए । तर, सहमति हुन सकेन ।

महासमिति बैठक आजदेखि सुरू हुँदैछ । जहाँ गगनले तयार पारेको उक्त प्रस्तावमाथि पनि छलफल हुनेछ ।