पक्राउ परेका ‘तपस्वी’ बम्जनले जेलमै सुरु गरे ध्यान

काठमाडौँ – हत्या र यौन हिंसाको आरोपमा गत साता पक्राउ परेका ‘तपस्वी’ राम बहादुर बम्जनले कारागारमै योग ध्यान सुरु गरेका छन्। महाेत्तरीकाे जलेश्वर कारागारमा रहेका बम्जनले जेलमै ध्यान सुरु गरेको स्रोतले जानकारी दिएको छ।

बम्जन माथि सर्लाहीको पत्थरकोट आश्रममा रहँदा एक किशोरीमाथि यौन सन्तुष्टि प्राप्त गर्ने गतिविधि तथा बाल यौन शोषण गरेको आरोप छ। सो अभियोगमा जिल्ला अदालत सर्लाहीले उनलाई पुर्पक्षका लागि जलेश्वर कारागार चलान गरेको थियो।

बम्जनले आफू सुत्ने कोठामै ध्यान सुरु गरेको जलेश्व कारागारका प्रमुख (जेलर) रामचन्द्र साहले बताए। उनले साँझ बिहान आफू सुत्ने ओछ्यानमा योग ध्यान गर्न थालेको साहको भनाई छ।

बम्जन शान्त देखिएको र जेलमा रहेका अन्य कैदीहरुसंग घुलमिल हुँदै गएको साहले जानकारी दिए। बम्जनले जेलमा रहेका अन्य कैदीहरुसंग कुराकानी गर्न थालेको बताइएको छ।

त्यस्तै, बम्जनलाई सुत्ने ओछ्यान छुट्टै दिए पनि छुट्टै कोठा दिइएको छैन। अन्य कैदीबन्दीलाई पकाएको मेसको खाना खान अस्वीकार गरेका बम्जनलाई कारागारमा रहेका बाबा (जोगी)हरुसँगै साकाहारी खाना खाने व्यवस्था गरिएको छ।