कोशीमा सभामुख लिएको विषय छलफलमै रहेको राजेन्द्र लिङदेनको दाबी

काठमाडौं। राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङदेनले कोशीमा पार्टीले सभामुख लिएको विषयमा आफ्नो पार्टीभित्र दुई मत देखापरेको गुनासो गरेका छन् । पार्टीभित्र यसबारे दुईथरी विचार आएको लिङदेनले बताएका छन् ।

भृकुटीमण्डपमा राप्रपाले आयोजना गरेको राष्ट्रिय एकता दिवसमा पत्रकारसँग कुरा गर्दै अध्यक्ष लिङदेनले भने, ‘सभामुखमा हामी कोशीमा मात्रै सहभागी भएको होइन, योभन्दा अगाडि बागमतीमा पनि हाम्रो सहभागिता छ । लुम्बिनी प्रदेशमा उपसभामुखका रुपमा हाम्रो सहभागिता छ । यो नौलो कुरा होइन ।’

लिङदेनले अगाडि भने, ‘तर अहिले परिवर्तित सन्दर्भमा कोशी प्रदेशमा सभामुखमा हामी जाने कि नजाने भन्ने छलफलकै विषय थियो । हतार गर्नुहुन्न भन्ने हामी सबैको सहमति थियो । म देशबाहिर भएका बेला हाम्रो कोशी प्रदेशका साथीहरूले निर्णय गरेर सहभागी हुनुभयो ।’

अध्यक्ष लिङदेन भन्छन्, ‘यस विषयमा विभिन्न मतहरु छन् । एकथरि साथीहरूको चर्को स्वरमा तुरुन्तै फिर्ता हुनुपर्छ भन्ने पनि छ । अर्कोतर्फ साथीहरुको के तर्क छ भने कोशीमा मात्र होइन, हामी त अगाडिदेखि नै सहभागी छौं । प्रदेशसभामा होस् वा प्रतिनिधिसभामा, यदि संसदमा हामी छौं भने त्यसको सर्वोच्च पद सभामुख हामीले कसैसँग शर्त नगरिकन पाउँछौं भने त्यो कसरी अन्यथा हो, त्यो कार्यकारी पद पनि होइन भन्ने तर्क पनि साथीहरुको छँदैछ । सदस्य हुने सभामुखचाहिँ नहुने भन्ने कुरा पनि छ ।’