२५ हजार टन चिनीको खरिद प्रक्रिया आजबाट सुरु, तिहारअघि नै बिक्री गर्ने तयारी

काठमाडौँ। नेपाल सरकारले बजारमा चिनी उपलब्ध गराउन आजबाट २५ हजार टन चिनी खरिद प्रक्रिया सुरु गर्ने भएको छ । उक्त चिनी सरकारले तिहार अघि नै बजारमा बिक्री गर्ने जनाएको छ ।

चिनी बजारमा बिक्रीसँगै चिनी अभाव नहुने वाणिज्य आपूर्ति तथा संरक्षण विभागका महानिर्देशक तीर्थराज चिलुवालले बताए । भारतले नेपालमाथि चिनी निर्यातसम्बन्धी प्रतिबन्ध लगाएसँगै बजारमा चिनी अभाव भएको थियो । भारतले नेपालाई २५ हजार टन चिनी उपलब्ध गराउने जनाएपछि सरकारले खरिद गर्ने भएको हो ।

वाणिज्य आपूर्ति तथा संरक्षण विभागका महानिर्देशक तीर्थराज चिलुवालका अनुसार जिटूजी प्रक्रियाबमोजिम भारतले नेपाललाई दिने चिनी तिहार अगावै बजारमा पठाइनेछ । उनकाअनुसार चिनी ल्याउनका लागि आइतबारबाट नै प्रक्रिया थालिनेछ । उनले भने, “भारतले बेच्ने २५ हजार टन चिनी तिहार अघि नै बजारमा पठाउँछौँ । आइतबार बाट खरिदको प्रक्रिया सुरु हुनेछ ।” भारतबाट चिनी आयात भएपछि अहिले देखिएको चिनीको कालोबजारी घट्ने अपेक्षा रहेको उनले सुनाए । उनका अनुसार जी टू जी प्रक्रियाबाट ल्याउने चिनीको भन्सार महसुल ५० प्रतिशत मात्र तिर्नुपर्ने भएकाले पहिलेको चिनीको तुलनामा मूल्य समेत कम पर्नेछ ।

भारतले नेपाललाई चिनी दिने भनेपछि अहिले व्यावसायीहरुले चिनी खरिद गरिदिनुपर्‍यो भनेर फोन गर्ने गरेको उनले बताए । भारतले दिने भनेको चिनी साल्ट ट्रेन्डिङ कर्पोरेसन र खाद्य व्यवस्था तथा व्यापार कम्पनी लिमिटेडले ल्याउने उनको भनाइ छ । उनले भने, “भारतबाट चिनी आयात भएपछि बजारमा अहिले देखिएको चिनीको अभाव कम हुँदै जानेछ, चिनीको मूल्य पनि सस्तो हुनेछ ।”