एकीकृत समाजवादीले बोलायो आकस्मिक बैठक, उद्धार र राहतमा जुट्न अध्यक्ष नेपालको अपिल

काठमाडौं । नेकपा (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले जाजरकोट केन्द्रबिन्दु भएर गएको विनाशकारी भूकम्पले ठूलो जनधनको क्षति गराएको भन्दै तत्काल उद्दार तथा राहतमा लाग्न नेपाल सरकार र पार्टी पंक्तिलाई आग्रह गर्नुभएको छ ।

शुक्रवार राति गएको विनाशकारी भूकम्पमा परी शनिवार विहानसम्म १ सय ३१ जनाले ज्यान गुमाइसकेका छन् भने सयौको संख्यामा घाइते भएका छन् । घाइतेलाई तत्काल उपचारको ब्यवस्था गर्न अध्यक्ष नेपालले सरकार र संघसंस्थालाई आग्रह गर्नुभएको छ भने उद्दार तथा राहत कार्यमा जुट्न पार्टी पंक्तिलाई निर्देशन दिनुभएको छ ।

‘शुक्रवार मध्यराति गएको विनाशकारी भूकम्पमा परी ठुलो जनधनको क्षति भएको छ, त्यसप्रति म निकै दुःखी छु’, अध्यक्ष नेपालद्धारा जारी विज्ञप्तिमा भनिएको छ ‘घाइतेहरुको उपचार र तत्काल उद्दार तथा राहत कार्यमा जुट्न नेपाल सरकार, विभिन्न संघ संस्था, पार्टी पंक्ति र आम नागरिकमा अपिल गर्न चाहन्छु ।’

अध्यक्ष नेपालले नेकपा (एकीकृत समाजवादी)को आकस्मिक सचिवालय बैठक बोलाउनुभएको छ । बैठक पार्टी कार्यालय आलोकनगरमा विहान ९ बजेदेखि शुरु भएको पार्टीका उपमहासचिव तथा मन्त्री प्रकाश ज्वालाले बताउनुभएको छ । विनाशकारी भूकम्पले ठूलो मानवीय क्षति गरेपछि उपयुक्त निर्णय लिन र उद्धार तथा राहतमा पार्टीको योजना बनाउन बैठक बोलाइएको छ ।