लगातार दोस्रो जितको खोजीमा नेपाल आज मलेसियासँग भिड्दै

काठमाडौँ । काठमाडौंमा जारी आइसिसी टी–२० विश्वकप एसिया फाइनल क्षेत्र छनोटमा नेपाल आफ्नो दोस्रो खेलमा आज मलेसियासँग भिड्दै छ । नेपाल र मलेसियाबीचको खेल दिउँसो साढे १ बजे कीर्तिपुरस्थित त्रिवि मैदानमा सुरु हुनेछ ।

नेपाल प्रतियोगितामा लगातार दोस्रो जितको खोजीमा छ । नेपालले पहिलो खेलमा सिंगापुरलाई ८ विकेटले हराएको थियो । मलेसिया भने प्रतियोगितामा पहिलो जितको खोजीमा छ । ऊ पहिलो खेलमा ओमानसँग ३२ रनले पराजित भयो ।

मलेसियासँग हेड टु हेड

हालसम्म नेपाल र मलेसियाले एकअर्काविरुद्ध ९ टी–२० खेल खेलेका छन् । जसमा नेपालले ८ र मलेसियाले एक खेल जितेको छ । पछिल्लो पाँच खेलमा नेपालले मलेसियालाई ४ खेलमा हराएको छ ।

यी दुई टिमले अन्तिमपटक गत वर्षको अप्रिलमा खेलेका थिए । जसमा नेपाल ८५ रनले विजयी भयो । नेपाल यसपटक पनि मलेसियाविरुद्ध सहज जित निकाल्ने योजनामा छ । मलेसिया भने नेपालसँग बदला लिने दाउमा छ ।