त्रिदेशीय टी-२० सिरिजमा हङकङविरूद्ध नेपालले पहिला बलिङ गर्ने

काठमाडौँ। त्रिदेशीय टी-२० सिरिजमा आज(बिहीबार) हुने हङकङविरूद्धको खेलमा नेपालले पहिला बलिङ रोजेको छ।

मुलपानी क्रिकेट मैदानमा भएको टस जितेर नेपालले पहिला बलिङ गर्ने निर्णय गरेको हो। यसअघि बुधबार भएको पहिलो खेलमा नेपालले युएईमाथि ७ विकेटको जित हात पारेको थियो।

युएईले दिएको १४१ रनको लक्ष्य नेपालले १८.५ ओभरमा पूरा गर्‍यो।

नेपालको जितमा कप्तान रोहितकुमार पौडेलले नटआउट ५१ रन र दीपेन्द्रसिंह ऐरीले नटआउट ३४ रन बनाए। रोहितले ४० बलमा ५ चौका र दीपेन्द्रले २३ बलमा ३ चौका र १ छक्का हिर्काए।

नेपालका ओपनर कुशल भुर्तेल १४ रनमा आउट भएका थिए। अर्का ओपनर आसिफ शेखले २३ रनको योगदान दिँदा कुशल मल्ल ११ रन जोडेर आउट भए।