रुपन्देहीबासीलाई विरोधमा उत्रिन कांग्रेस नेताको आव्हान

काठमाडौं । नेपाली कांग्रेस संसदीय दलका प्रमुख सचेतक बालकृष्ण खाणले बुटवलमै प्रदेश राजधानी कायम राख्न माग गरेका छन्।

रुपन्देहीबाट प्रतिनिधित्व गर्ने नेता खाणले राजनीतिक पूर्वाग्रही राखेर राजधानी सार्न खोज्नु नागरिकको भावना विपरीत भएको दावी गरेका छन् । उनले प्रदेशको राजधानी बुटवलमै हुनुपर्ने माग गरेका छन् ।   

नेता खाणले सोमबार विज्ञप्ति जारी गर्दै राजधानी सार्ने प्रस्तावको विरोधमा भइरहेका शान्तिपूर्ण विरोधमा धरपकड गरिएको भन्दै आपत्ति जनाएका छन्।

‘लोकतान्त्रिक मूल्य र मान्यताको उपहास हुने गरी निषेधाज्ञा जारी गर्ने, आमनागरिकमा डर त्रास  भय सिर्जना गर्ने र धरपकड गरी गिरफ्तार गर्ने जस्ता कार्य गरेर सरकारले गैरलोकतान्त्रिक चरित्र प्रदर्शन गरेको छ’, विज्ञप्तिमा भनिएको छ, ‘आमनागरिक, व्यवसायी, पत्रकार, नेता कार्यकर्तालाई तानाशाही रूपमा प्रक्राउ गर्नु खेदजनक छ।’

उनले प्रदेश ५ को राजधानी सार्ने प्रस्तावको विरोधमा शान्तिपूर्ण प्रदर्शनमा उत्रिन समेत रुपन्देहीबासीलाई  आग्रह गरेका छन्।