म्यान सिटीको लगातार छैटौँ जित, हालान्डको निरन्तर उच्च लय

काठमाडौं । इङ्लिस प्रिमियर लिग फुटबलमा शनिवार राती साबिक विजेता म्यानचेस्टर सिटीले नटिङ्घमलाई २-० गोलले हराएको छ ।

म्यान सिटीका लागि फिल फोडेन र एर्लिङ हालान्डले गोल गरे । सुरुको १४ मिनेटभित्रै २-० गोलले अगाडि बढेको म्यान सिटी दोस्रो हाफको सरुवातमा १० खेलाडीमा सीमित भएको थियो । ४६ औँ मिनेटमा रोड्रीले सोझै रातो कार्ड पाएका थिए ।

म्यान सिटीले यो सिजन घरेलु लिगमा खेलेका सबै ६ खेल जितेको छ। म्यान सिटीको ६ खेलबाट १८ अंक छ । दोस्रो स्थानमा रहेको टोट्टनहामको ५ खेलबाट १३ अंक छ । लिभरपुलको पनि ५ खेलबाट १३अंक छ ।

हालान्ड यो सिजन पनि उच्च लयमा छन् । उनले घरेलु लिगमा ८ गोल गर्दै सर्वाधिक गोलकर्ताको सूचीमा शीर्षस्थानमा छन् ।

दोस्रो स्थानमा रहेका खेलाडीको ४ गोल छ । शनिवार राती भएका अन्य खेलमा म्यानचेस्टर युनाइटेडले बर्नलीलाई १-० र एभर्टनले ब्रेन्टफोर्डलाई ३-१ गोलले हराए ।