क्यानको मतदान आज साढे १२ बजेदेखि

काठमाडौँ। आज नेपाल क्रिकेट संघ क्यानको निर्वाचनका लागि मतदान हुँदै छ । क्यानको नयाँ नेतृत्व छनोटकालागि ८५ जना प्रतिनिधिले १७ सदस्यीय कार्यसमिति चयन गर्दै छन् ।

शुक्रबार बालुवाटारको आम्रपाली ब्यांकेटमा उद्घाटन गरिएको साधारणसभाको आज नयाँ बानेश्वरमा रहेको एभरेष्ट होटेलमा चुनावी प्रक्रिया अघि बढाइएको छ । निर्वाचन समितिले प्रकाशित गरेको कार्यतालिका अनुसार अहिले सवा ९ बजेदेखि सवा १० बजेसम्म उम्मेदवारी दर्ताको समय तोकिएको छ ।

साढे १० बजे उम्मेदवारको प्रथम नामावली प्रकाशित हुने छ भने ११ बजेसम्म उम्मेदवारविरुद्धको दावी विरोधको समय दिइएको छ । त्यसैगरी उम्मेदवारी फिर्ताको समय पौने १२ बजेसम्मलाई तोकिएको छ भने अन्तिम नामावली प्रकाशन १२ः५ मा हुने छ । त्यसपछि साढे १२ बजेदेखि मतदान हुने छ । मतदानको समय १ घण्टालाई तोकिएको छ । मतदानपछि मत परिणाम घोषणा, प्रमाणपत्र वितरण र सपथग्रहण आजै हुने छ ।

अधिवेशनमा नयाँ नेतृत्व चयन गर्दा वर्तमान अध्यक्ष चतुरबहादुर चन्दले कार्यकाल दोहो¥याउने तयारी गरेका छन् । तर, उनलाई सर्वसम्मत हुन नदिने तयारी पनि भएको बुझिएको छ ।

बर्दियाका प्रतिनिधि विनय भण्डारीले अध्यक्षमा उम्मेदवारी घोषणा गरेपछि चन्दलाई पनि चुनावै लड्नु पर्ने अवस्था देखिएको छ । तर, सबै पदमा सर्वसम्मतको प्रयास भने जारी रहेको बुझिएको छ । यसैगरी उपाध्यक्षमा रोशन सिंहको चर्चा छ भने सचिवमा प्रसान्त मल्ल र पारस खड्काको विचमा चुनावी प्रतिस्पर्धा हुन सक्छ ।

मल्ल यसअघिको कार्यसमितिमा केन्द्रीय सदस्य रहका थिए भने नेपाली क्रिकेट टिमका पूर्व कप्तान पारस बागमति प्रदेश अध्यक्ष हुँदै केन्द्रीय सचिवको प्रतिस्पर्धामा उत्रिन लागेका हुन् ।

कोषाध्यक्षमा पदम खड्काको चर्चा रहेको छ । १७ सदस्यीय कार्यसमितिमा अध्यक्ष, उपाध्यक्ष, सचिव र कोषाध्यक्षबाहेक १३ जना सदस्यका लागि भने चुनावै हुने सम्भावना रहेको छ ।