काठमाडौं । नेपालमा आज हालसम्मकै धेरै संख्यामा संक्रमित भेटिएका छन् । आज २ हजार ७ सय २२ जनामा कोरोना भाइरसको संक्रमण पुष्टि भएको हो।
शुक्रबार विभिन्न प्रयोगशालामा गरिएको परीक्षणमा देशभर थप २ हजार ७ सय २२ जनामा कोरोनाको संक्रमण पुष्टि भएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिए।
यस्तै कोरोना मुक्त हुनेको संख्या पनि उल्लेख्य रहेको छ । शुक्रबार मात्र कोरोनालाई जितेर ३ हजार ३ सय ७ जना अस्पतालबाट डिस्चार्ज भएका छन्।
योसँगै नेपालमा कोरोना संक्रमितको संख्या ८२ हजार ४ सय ५० पुगेको छ। संक्रमितमध्ये ६० हजार ६ सय ९६ जना निको भएर घर फर्किएका छन् भने कोरोना संक्रमणबाट अहिलेसम्म ५ सय २० जनाको मृत्यु भएको छ।
