१० लाख अवैध भारतीय रुपैयाँ विराटनगरबाट बरामद

मोरङ। प्रहरीले विराटनगरमा अवैध रुपमा भित्रिएको १० लाखभन्दा बढी भारतीय रुपैयाँसहित एकजनालाई पक्राउ गरेको छ ।

आज इलाका प्रहरी कार्यालय रानीको टोलीले विराटनगर महानगरपालिका–१६ स्थित नेपाल–भारत सीमा क्षेत्रबाट ३२ वर्षीय चन्दनकुमार यादवलाई पक्राउ गरेको हो।

जिल्ला प्रहरी कार्यालय मोरङका प्रवक्ता प्रहरी नायव उपरीक्षक रञ्जनकुमार दाहालका अनुसार पक्राउ परेका यादव भारतको बिहारस्थित खगडीयाँ गाउँका हुन्।

प्रहरीले उनको साथबाट ५ सय रुपैयाँ दरको कुल १० लाख ५० हजार भारतीय रुपैयाँ बरामद गरेको हो। भारततर्फबाट पैदल नेपाल प्रवेश गरेका यादवलाई शंका लागेर खानतलासी गर्दा उक्त रकम बरामद भएको हो।

बरामद भएको नोटसहित यादवलाई आवश्यक कारबाही प्रक्रिया अघि बढाउन राजस्व अनुसन्धान कार्यालय इटहरीमा बुझाइने भएको छ।