खोलाले बगाउँदा बेपत्ता भएका आमाछोरा मृत अवस्थामा भेटिए

सिन्धुलीमाढी । घाँस काट्न गएका बेला खोलाले बगाउँदा तीन दिनदेखि बेपत्ता भएका सिन्धुलीको हरिहरपुरगढी गाउँपालिका –६ राँगेचुरी निवासी एकै घरका आमाछोरा मृत अवस्थामा भेटिएका छन् ।

बेपत्ता मध्येकी ५७ बर्षीया माया गोले (आमा) लाई रौतहटको गरुडा नजिक बागमती नदीको किनारमा आइतबार बिहान मृत अवस्थामा फेला पारेको सो वडाका अध्यक्ष एकबहादुर मोक्तानले जानकारी दिए । त्यस्तै, २८ बर्षीय छोरा राजकुमार गोलेलाई गाउँकै क्यानखोला र खड्कुले खोलाको दोभानमा शनिबार दिउँसो मृत अवस्थामा फेला पारेको उनले बताए।

उनका अनुसार बेपत्ता भएका आमाछोरा बिहीबार दिउँसो ३ बजेतिर घरदेखि करिब एक किलोमिटर टाढा रहेको ब्रमठाकुर सामुदायिक वनमा घाँस काट्न गएका थिए । बेलुकासम्म घरमा नफर्केपछि आफन्त, स्थानीय र प्रहरीले खोजी गर्न सुरु गरेका थिए ।

जिल्ला प्रहरी कार्यालय सिन्धुलीका प्रहरी निरीक्षक केशब कटुवालले रौतहट जिल्लाको गरुडा नजिक बागमती नदीको किनारमा एक जना महिलाको शब फेला परेको बताए ।