प्रतिबन्धित औषधिसहित धनकुटाबाट एक युवक पक्राउ

धनकुटा। धनकुटाको छथर जोरपाटी गाउँपालिकाबाट प्रतिबन्धित औषधिसहित एक व्यक्तिलाई प्रहरीले पक्राउ गरेको छ । पक्राउ पर्नेमा छथर जोरपाटी-६ सिधुवा बजारमा बस्दै आएका २३ वर्षीय फुर्सुदी शेर्पा रहेको प्रहरीले जनाएको छ ।

शेर्पा बस्ने कोठाबाट प्रतिबन्धित औषधि ईस्पासपेन १ हजार ५ सय ५५ र ट्रामोल १ हजार १ सय ५८ बरामद गरिएको जिल्ला प्रहरी कार्यालयका प्रहरी निरीक्षक मानबहादुर श्रेष्ठले जानकारी दिए ।

स्वास्थ्यकर्मीका अनुसार, शरीर दुखाइ कम गर्न प्रयोग गरिने उक्त औषधि चिकित्सकको सल्लाहबिना बिक्री वितरण तथा सेवन गर्न मनाही गरिएको छ । उक्त औषधि लागूऔषधको रुपमा समेत प्रयोग गर्ने गरिएको प्रहरीको भनाइ छ । सिधुवा प्रहरी चौकीबाट खटिएका प्रहरीले मंगलबार औषधि बरामद गरेको हो ।

यसैबीच, पक्राउ परेका शेर्पालाई बरामद गरिएको औषधिसहित बुधबार औषधि व्यवस्था विभाग विराटनगरमा पठाएको प्रहरी निरीक्षक श्रेष्ठले जनाए । विभागले छानबिन गरी कानुनी कारबाही प्रक्रिया अघि बढाइने जनाइएको छ ।