सुदूरपश्चिम: सरकारलाई चाँडै पूर्णता दिन मुख्यमन्त्रीलाई देउवाको सुझाव

कैलाली । नेपाली कांग्रेसका सभापति तथा तत्कालीन प्रधानमन्त्री शेरबहादुर देउवाले सुदूरपश्चिम प्रदेश सरकारलाई पूर्णता दिन ढिला नगर्न सुदूरपश्चिम प्रदेशका मुख्यमन्त्री कमल बहादुर शाहलाई सुझाव दिएका छन् । शनिबार भएको भेटघाटमा सभापति देउवाले अब सरकार विस्तारमा ढिला गर्न नहुने बताएका थिए ।

सुदूरपश्चिममा अहिले भूमि व्यवस्था कृषि तथा सहकारी मन्त्रालय र आन्तरिक मामिला तथा कानुन मन्त्रालय मन्त्री विहीन छ । कृषि मन्त्रालय विगत ७ महिना देखी मन्त्री विहीन रहेको हो भने पृथ्वी बहादुर सिंहको बझाङ दुर्घटनामा निधन भएपनि कानुन मन्त्रालय पनि मन्त्री विहीन भएको हो ।

सभापति देउवासँग मुख्यमन्त्री शाह सहित भौतिक पूर्वाधार विकास मन्त्री प्रकाश देउवा र आर्थिक मामिला तथा योजना मन्त्री नरेश बहादुर शाहीले भेटेका थिए । मुख्यमन्त्री शाहले सत्ता गठबन्धनका शीर्ष नेताहरू बिच चाँडै सहमति भए सरकार विस्तारमा सहज हुने सभापति देउवालाई बताएका थिए ।

सरकार विस्तारको गाँठो फुकाउन काठमाडौँ पुगेको मुख्यमन्त्री सहितको टोलीले माओवादी अध्यक्ष तथा प्रधानमन्त्री पुष्पकमल दाहाल प्रचण्डसँग निर्णायक छलफल गर्ने तयारी गरेको छ । भोलि प्रधानमन्त्री प्रचण्ड, नागरिक उन्मुक्तिका संरक्षक रेशम चौधरी र प्रदेश सरकार बिच ठोस छलफल हुने बताइएको छ ।

‘