वामदेवको सांसद पदलाई अदालतमा चुनौती

काठमाडौं । राष्ट्रियसभा सदस्य बनेका वामदेव गौतमको नियुक्तिलाई चुनौती दिँदै अदालतमा रिट दायर भएको छ।  उनलाई काम गर्न रोक लगाउन माग गर्दै सर्वोच्च अदालतमा दर्ता भएकाे रिट निवेदनकाे पेशी बुधबारकाे लागि ताेकिएकाे छ ।

वरिष्ठ अधिवक्ता दिनेश त्रिपाठीले गौतमको नियुक्ति असंवैधानिक भन्दै बदरको मागसहितको निवेदन सोमबार दर्ता गरेका हुन् ।

प्रतिनिधिसभा निर्वाचनमा बर्दियाबाट पराजित सत्तारुढ दल नेकपाका नेता गौतम केही दिनअघि राष्ट्रियसभा सदस्य नियुक्त भएका थिए ।

त्रिपाठीले सर्वोच्चमा दर्ताका लागि पेश गरेको निवेदनमा तत्काल राष्ट्रियसभा सदस्यका रूपमा काम नगर्न/नगराउन अन्तरिम आदेश माग गरिएको छ ।

उनको नियुक्तिका लागि मन्त्रिपरिषद्ले गरेको सिफारिस असंवैधानिक भएकाले खारेज हुनुपर्ने माग गरेका छन् । यस्तै राष्ट्रियसभाका सदस्य चयनका लागि आवश्यक ‘गाइडलाइन’ जारी गरिदिन पनि निवेदनमा माग गरिएको छ।