कांग्रेस बैठकमा केन्द्रीय सदस्यहरूले धारणा राख्दै

काठमाडौं। सत्तारुढ नेपाली कांग्रेसको केन्द्रीय समिति बैठक सुरू भएको छ। पार्टी कार्यालय सानेपामा जारी बैठकमा केन्द्रीय सदस्यहरुले आ-आफ्ना धारणा राखिरहेका छन्। हिजो बिहीबार ३५ जना केन्द्रीय सदस्यहरूले आ-आफ्नो धारणा राखेका थिए। उक्त मंगलबारदेखि बैठक सुरू भएको हो।

बाँकी सदस्यहरूले आज बोल्ने कांग्रेसले जनाएको छ। करिब एक वर्षपछि बसेको केन्द्रीय समिति बैठकमा बोल्ने अधिकांश नेताहरू सुशासन र भ्रष्टाचार नियन्त्रणजस्ता विषयमा भन्दा गुट, उपगुटका विषयमा बढी केन्द्रित देखिएका छन्।

अधिकांश बोल्ने नेताको विषय गुटप्रति नै लक्षित देखिने गरेको छ। बैठकको तेस्रो दिन बिहीबार पनि यस्तै दृश्य देखियो। अधिकांश केन्द्रीय सदस्यहरूले प्रदेशमा पार्टी नेतृत्वमै सरकार रहेको, स्थानीय तहको प्रतिनिधित्वमा पनि देशभर पार्टी बलियो हुँदाहुँदै जनतालाई कांग्रेसले कुनै आभाष दिन नसकेको आरोप लगाएका छन्।

बैठकमा नक्कली भुटानी शरणार्र्थी बनाएर अमेरिका पठाउने प्रकरणमा मुछिएका पूर्वगृहमन्त्री तथा कांग्रेस केन्द्रीय सदस्य बालकृष्ण खाँणलाई कारबाही गर्ने नगर्ने विषयमा कांग्रेस विभाजित छ।

कांग्रेसको विधानले वरिष्ठ नेतासम्बन्धी कुनै प्रावधान राखेको छैन। विधानमा कुनै प्रावधान नभए पनि केही केन्द्रीय सदस्यहरूले भने आफू निकटका नेतालाई वरिष्ठ नेता दिनुपर्ने माग गरिरहेका छन्।

कांग्रेसको विधानमै नभएको वरिष्ठ नेता राख्न बिलम्ब भएको आवाज यतिबेला बैठकमा उठिरहेको छ।