बाँके, ४ असोज । कोरोना भाइरस संक्रमण भएका बिरामी जटिल अवस्थामा पुगेपछि प्लाज्माथेरापी दिएर बचाउने प्रयास गरिन्छ । तर बाँकेमा त्यो प्रयास पनि बिफल भएको छ । बाँकेमा प्लाज्माथेरापी विधिबाट उपचार गरिएका एक कोरोना संक्रमितको ज्यान गएको छ ।
नेपालगञ्ज उपमहानगरपालिका–२१ पुरैनीका ५९ वर्षीय पुरुषको भेरी अस्पताल नेपालगञ्जमा उपचारका क्रममा शनिबार राति मृत्यु भएको हो । योसँगै बाँकेमा कोरोनाबाट १० जनाको मृत्यु भएको छ ।
गत भदौ २० गते साँझ अस्पताल भर्ना भएका उनको २१ गते कोरोना पोजेटिभ रिपोर्ट आएको थियो । प्लाज्माथेरापीबाट उपचार गरिएका उनको अवस्था बिग्रिदै गएपछि शनिबारदेखि भेन्टिलेटरको सहायतामा उपचार जारी थियो । तर गए राति साढे ११ बजे उनको मृत्यु भएको स्वास्थ्य कार्यालय बाँकेले जनाएको छ ।
