आज बस्ने भनिएको समाजवादी मोर्चाको बैठक स्थगित

काठमाडौं । आज (बुधबार) बस्ने भनिएको समाजवादी मोर्चाको बैठक स्थगित भएको छ ।

प्रधानमन्त्री समेत रहेका मोर्चा घटक दल माओवादी केन्द्रका अध्यक्ष पुष्पकमल दाहाल प्रचण्डी पत्नी सीता दाहालको निधनका कारण अपराह्न चार बजेका लागि तय भएको बैठक स्थगित भएको हो ।

‘आज बैठक नबस्ने भयो । अर्को बैठकका लागि नयाँ मिति तय गर्छौं,’ एकीकृत समाजवादीका उपाध्यष राजेन्द्र पाण्डेले भने ।

दाहालको आज बिहान नर्भीक अस्पतालमा निधन भएको हो । स्वास्थ्य अवस्था गम्भीर भएपछि उनलाई आज बिहान ८ बजे अस्पताल लगिएको थियो ।

आकस्मिक कक्षमा सीपीआर लगायतका विधिबाट उपचार गरिएको थियो । तर सुधार नभएपछि ८ बजेर ३३ मिनेटमा मृत घोषणा गरिएको अस्पतालले पत्रकार सम्मेलन गरी जानकारी दिएको हो।