भोलिदेखि काठमाडौं महानगरमा भारतीय चलचित्र प्रदर्शन निषेध

काठमाडौं । भोलिदेखि काठमाडौं महानगरपालिकामा भारतीय चलचित्र प्रदर्शन निषेध गरिने भएको छ । काठमाडौं महानगरका मेयर बालेन शाहले सामाजिक सञ्जालमार्फत महानगरमा भारतीय चलचित्र प्रदर्शन गर्न भोलिदेखि निषेध गरिने बताएका हुन् ।

नगर प्रहरीलाई खटाएर भारतीय फिल्मको प्रदर्शन रोक्न निर्देशन दिइसकिएको बताइएको छ । मेयर शाहको निर्देशनपछि नगर प्रहरीले आइतबार बेलुकासम्म सबै हलमा पुगेर भारतीय फिल्म नचलाउन निर्देशन दिने भएको छ ।

मेयर शाहले फेसबुकमा लेखेका छन्, ‘काठमाडौं महानगरपालिका क्षेत्रभित्र उक्त राष्ट्रहित विपरीतको चलचित्रको प्रदर्शनलाई निषेध गरेर मात्र देशभित्रका अन्य क्षेत्र र विदेशमा सो चलचित्र प्रदर्शन हुन दिने हो भने त्यसले भ्रामक तथ्य स्थापित गर्ने भएकोले उक्त चलचित्रबाट आपत्तिजनक अंश नहटाएसम्म काठमाडौ महानगरमा कुनै पनि भारतीय चलचित्र प्रदर्शन गर्न भोलिदेखि निषेध गरिएको छ ।’