मुख्य दलसँग छलफलमा सभामुख घिमिरे

काठमाडौं । भ्रष्टाचार गरेको आरोप पछि प्रतिनिधिसभाको बैठक प्रमुख प्रतिपक्ष दल नेकपा एमालेले अवरुद्ध गरेपछि सभामुख देवराज घिमिरेले अहिले सदनको अवरोध हटाउनेबारे छलफल गरिरहेका छन् ।

माओवादी केन्द्रका सांसद लेखनाथ दाहालले एमाले अध्यक्ष केपी शर्मा ओली नेतृत्वको सरकारले पशुपतिमा जलहरी राख्ने क्रममा भ्रष्टाचार गरेको आरोप लगाएपछि बैठक अवरोध गरेको थियो ।

सभामुखका प्रेस विज्ञ शेखर अधिकारीका अनुसार अहिले संसदमा एमालेले गरेको अवरोध हटाउन मुख्य दलका नेताहरूसँग सभामुखले छलफल गरिरहेका छन् ।

छलफलमा एमालेले सांसद दाहालले लगाएको आरोप पुष्टि गर्नुपर्ने र यसको जवाफ सरकारले दिनुपर्ने अडान कायमै राखेको छ । एमालेको अवरोधपछि २० मिनेटका लागि स्थगित भएको बैठक अझै बस्ने सकेको छैन । बैठकको समय परिवर्तन गरी ३ बजेलाई तोकिएकोमा त्यो पनि टरेको छ ।