जुम्लामा पार्क निर्माणमा भ्रष्टाचार, प्रशासकीय अधिकृतसहित ६ जनाविरुद्ध मुद्दा

काठमाडौं । जुम्लाको तिला गाउँपालिकाका नाग्मा पार्क निर्माणमा भ्रष्टाचार गर्ने ६ जनाविरुद्ध विशेष अदालतमा मुद्दा परेको छ । आज अख्तियार दुरुपयोग अनुसन्धान आयोगले भ्रष्टाचार गरेको दाबी गर्दै उनीहरुविरुद्ध मुद्दा दायर गरेको हो ।

मुद्दा दायर हुनेमा गाउँपालिकाका तत्कालीन निमित्त प्रमुख प्रशासकीय अधिकृत हरिश्चन्द्र नेपाली सार्की, इन्जिनियर जनक रोकाय, सव-इन्जिनियर प्रेमबहादुर बस्नेत रहेका छन् ।

त्यसैगरी नाग्मा पार्क तथा उद्यान निर्माण उपभोक्ता समितिका अध्यक्ष नन्दबहादुर बुढा, सचिव अर्जुन बुढा र कोषाध्यक्ष दिलधरा दमाईविरुद्ध पनि मुद्दा दायर गरिएको छ ।

कम काम गरी प्राविधिकसँग मिलि कार्य सम्पादन मूल्याङ्‍कन पुरा भएको देखाई उपभोक्ता समिति र प्राविधिकहरु मिलि बिल भरपाई बनाई अनुगमन गर्न लगाई सरकारी रकमको चरम दुरुपयोग गरेको अख्तियारको ठहर छ ।