जन्मकैदको सजाय पाएका रेशम चौधरी भन्छन्- ‘सर्वोच्चको फैसलाले मन विचलित भएको छैन’

काठमाडौं। टीकापुर हत्या काण्डमा दोषी ठहरिएर जन्मकैदको सजाय पाएका रेशम चौधरीले सर्वोच्चको फैसला आएको भोलिपल्ट संयमित प्रतिक्रिया दिएका छन् । सर्वोच्चका न्यायाधीशद्वय डा.आनन्दमोहन भट्टराई र नहकुल सुवेदीको इजलासले उच्च अदालत दिपायलको फैसला सदर गरेको थियो ।

चौधरीले एक विज्ञप्ति जारी गर्दै सवोच्चको फैसलालाई सम्मान र स्वीकार गर्ने बताएका छन् ।

‘‘सर्वोच्च अदालतले गरेको फैसला मप्रति न्यायिक नहुन सक्छ, तर त्यसो भन्दैमा स्वीकार्नुको विकल्प हुन्न, विज्ञप्तीमा उनले भनेका छन् – ‘टिकापुर घटनामाथि गरिएको फैसलामा पुनरावलोकनको बाटो खुला रहेको छ ।’ यद्यपि, चौधरीले पुनरावेदन गर्ने अथवा नगर्ने स्पष्ट रुपमा खुलाएका छ्रैनन् ।

सम्मानित अदालतलाई सदा सम्मान गर्ने भन्दै चौधरीले फैसलामाथि अनर्गल टिप्पणी नगर्न सबैलाई आग्रहसमेत गरेका छन् ।

सर्वोच्चप्रति भरोसा रहेको भन्दै चौधरीले आफू अझै पनि न्यायिक पर्खाइमा रहेको उल्लेख गरेका छन् ।

‘म डिल्लीबजार कारागारमा धैर्य, सहनशीलताका साथ कैद भुक्तान गरिरहेको छु । स्वस्थ छु । रत्तिभर मन विचलित छैन । पुस्तक लेखिरहेको छु,’ उनले भनेका छन् ।

यसैबीच, सत्तारुढ दल नागरिक उन्मुक्ति पार्टीले जेठ ६ देखि १० गतेसम्म नेपाल बन्दको घोषणा गरेको छ ।

यसअघि उनलाई जिल्ला अदालत कैलाली र उच्च अदालत दिपायलले जन्मकैदको सजाय सुनाएको थियो । उच्च अदालतको फैसलाविरुद्ध चौधरीले सर्वोच्च अदालतमा पुनरावेदन गरेका थिए ।

२०७२ भदौमा कैलालीको टिकापुरमा थरुहट थारुवान आन्दोलनका क्रममा नेपाल प्रहरीका एसएसपी लक्ष्मण न्यौपानेसहित ७ जना सुरक्षाकर्मी र एक जना नाबालकको मृत्यु हुने गरी भएको हिंसात्मक घटनामा चौधरीले जन्मकैदको सजाय काटिरहेका छन् ।