दार्चुला हिमपहिरोमा बेपत्ता किशोरी ९ दिनपछि मृत फेला

दार्चुला। वैशाख १९ गते ब्यास गाउँपालिका–१ भोलुङमा गएको हिमपहिरोमा बेपत्ता भएको ९ दिनपछि किशोरीको शव भेटिएको छ । बुधबार अबेर साँझतिर डोटीको जोरायल गाउँपालिका–२ की १५ वर्षीया छिमी सोमो थापाको शव भेटिएसँगै हिमपहिरोमा बेपत्ता भएका पाँचै जनाको शव भेटिएको प्रहरीले बताएको छ।

ब्यास गाउँपालिका–१ छाङरुमा रहेको सशस्त्र प्रहरी बल नं. ५० गुल्म र सितापुल प्रहरी चौकिबाट खटिएका सुरक्षाकर्मीहरूले बेपत्ताहरूको खोजी गरेका थिए । यसअघि अन्य ४ जनाको शव फेला परेको ठाउँबाट करिब २ सय मिटर तल थापाको शव फेला परेको प्रहरीले जनाएको छ। बुधबार फेला परेको शवलाई बिहीबार बिहान भारतीय बाटो हुँदै सदरमुकाम खलंगा ल्याउँदै गरेको जिल्ला प्रहरी कार्यालयमा सूचना अधिकारी ज्ञानेन्द्रबहादुर सिंहले बताए । शवको जिल्ला अस्पतालमा पोष्टमार्टम गरी आफन्तको जिम्मा लगाउने प्रहरिले जनाएको छ ।

उक्त हिमपहिरोमा परेर ५ जना बेपत्ता भएका थिए । ७ जनाले भागेर ज्यान जोगाएका थिए ।