दार्चुला हिमपहिरोमा बेपत्ता पाँच जनाको पहिचान खुल्यो

काठमाडौं । दार्चुलाको व्याँस गाउँपालिका-१ छाङरुस्थित भोलुम डाँडामा हिम पहिरोमा परी बेपत्ता पाँच जनाको पहिचान खुलेको छ । बेपत्तामध्ये डोटी बुडरका तीन जना र दुँहु गाउँपालिकाका दुई जना रहेको प्रहरीले बताएको छ ।

बेपत्ता हुनेमा डोटीको जोरायल गाउँपालिका-२ बुडरकी ४५ वर्षीया नक्नी डोल्मा थापा, सोही ठाउँकी २८ वर्षीया ईश्वरी थापा र १५ वर्षीया क्षिमी सोमो थापा, दुँहु गाउँपालिका-४ की ३८ वर्षीया कमला कुँवर र १८ वर्षीय प्रवीण कुँवर रहेका छन् ।

बाक्लो हिउँ र अँध्यारो भएकाले उनीहरुको खोजी गर्न समस्या भएको प्रहरीले बताएको छ । जिल्ला प्रहरी कार्यालयका अनुसार केही बेरपछि पुनः उद्धार टोली पठाइने छ ।