बारामा छाप लगाएको २ वटा मतपत्र भेटिएपछि जसपा नेता पक्राउ, मतदानस्थल तनावग्रस्त

बारा। देवताल गाउँपालिका -७ स्थित जब्दी मतदान केन्द्रबाट जनता समाजवादी पार्टी (जसपा) का एक नेता पक्राउ परेका छन्। आज उपचुनावमा मतदान जारी रहेको बेला मतदान गर्ने क्रममा जसपाका नेता एवम् जिल्ला समन्वय समितिका सदस्य रामसागर यादवलाई मतपेटिका सुरक्षामा खटिएका प्रहरीले पक्राउ गरेको हो।

प्रहरीका अनुसार मत पेटिकामा यादवले स्वस्तिक छाप लगाएको २ वटा मत पत्र खसाउन खोजेपछि प्रहरीले उनलाई नियन्त्रणमा लिएको हो। पक्राउ परेका यादवलाई जिप्रका बारामा लगिएको छ। l

यादव पक्राउ परेपछि जसपाका स्थानीय नेता कार्यकर्ता विवाद गरेका छन्। विवाद बढेपछि यो मतदान केन्द्रमा नेपाल प्रहरी, सशस्त्र प्रहरी र नेपाली सेनाको थप बल मगाइएको छ। अहिले उक्त केन्द्रमा शान्तिपूर्ण मतदान भने जारी छ।