बाघको आक्रमणपछि बेपत्ता महिलाको शव फेला

कञ्चनपुर। घाँस काटिरहेको समयमा हिजो शुक्रबार बिहान बाघको आक्रमणपछि बेपत्ता भएकी महिलाको शव भेटिएको छ । बाघले आक्रमण गरेकै स्थानमा २२ घण्टापछि शव भेटिएको हो ।

‘महिलाको शव भेटिएको छ, बाघले दलदलमा लुकाएकोले निकाल्ने प्रयास भइरहेको छ,’ सब डिभिजन वन कार्यालय कुण्डाका सहायक वन अधिकृत दिनेश यादवले भने, ‘बाघले आक्रमण गरेकै ठाउँमा शव भेटियो ।’

शुक्रबार बिहान घर छेउकै खप्टी नालामा घाँस काटिरहेकी बेलौरी नगरपालिका ८ पचुईकी ४२ वर्षीया गंगा चन्दलाई बाघले आक्रमण गरेर लगेको थियो ।

बाघले महिलालाई लगेदेखि राति अबेरसम्मै खोजी गरिए पनि महिला भेटिएकी थिइनन् । बाघ सोही क्षेत्रमा भएका कारण खोजी गर्नसमेत समस्या भएको थियो ।

बाघलाई डार्ट गरेर नियन्त्रणमा लिएपछि शनिबार बिहानैदेखि खोजी सुरु भएको हो । बर्दियाबाट आएको प्राविधिक टोलीले बाघलाई डार्ट गरेर नियन्त्रणमा लिएको हो । नियन्त्रणमा लिइएको उक्त बाघलाई शुक्लाफाँटा राष्ट्रिय निकुञ्जको कोर एरियामा छाडिने यादवले जानकारी दिए।