दैलेख । लगातार परेको बर्षतसँगै आएको बाढीपहिरोसँगै दैलेखमा एकै दिन तीन जनाले ज्यान गुमाएका छन् । प्राकृतिक विपत्तिमा परेर एक जना बेपत्ता भएका छन् ।
ठाँटीकाँध गाउँपालिका वडा नं ४ गैरागाउँमा मङ्गलबार राति आएको पहिराले घर पुरिँदा ११ वर्षीय जनक कठायतको मृत्यु भएको छ भने अन्दाजी १२ वर्षीय लोकेश कठायत बेपत्ता भएका छन् । यस्तै भगवतीमाई गाउँपालिका –५ कट्टीमा लगातारको वर्षात्सँगै घर भत्किँदा बलबहादुर रावतको मृत्यु भएको छ । अन्य परिवार अलग घरमा सुतेको र बलबहादुर मात्रै सुतेको घर पहिराले पूरै पुरेको जिल्ला प्रहरी कार्यालयले जानकारी दिएको छ ।
नौमूले गाउँपालिका वडा नं ५ भित्रीखोला छेउमा खोलाले बगाएर मृत्यु भएका एक पुरुषको शव फेला परेको छ । मृत्यु हुनेमा नौमूले– ४ बस्ने २१ वर्षीय भविलाल बुढा रहेको जिल्ला प्रहरी कार्यालयका प्रमुख हरिबहादुर ओलीले जानकारी दिनुभयो ।
बुढाको मृत्यु खोलाले बगाएर नभई हत्या गरिएको हुन सक्ने जनाउँदै आफन्तले घटनाको विस्तृत छानबिन गरिदिन माग गरेका छन् । कालिका बजारबाट घर जान्छु भनेर जानुभएका उहाँको घरभन्दा करीब दुई घण्टा तल खोला किनारमा शरीरमा कपडा नभएका अवस्थामा शव भेटिएको थियो । टाउको र अन्य भागमा चोट देखिएको छ । घटनास्थल मुचुल्का गरिएको छ । शव परीक्षणका लागि स्वास्थ्य कार्यालय दैलेख ल्याउँदै गरिएको छ । नौमूले प्रहरीले घटनाको विस्तृत अनुसन्धान गर्ने बताएको छ ।
राजमार्ग अवरुद्ध
लगातारको वर्षात्सँगै कर्णाली राजमार्गको दैलेखखण्ड अवरुद्ध भएको छ । सदरमुकाम दैलेख बजारदेखि विभिन्न पालिका जोड्ने सडक अवरुद्ध छन् । पालिकाले वडास्तरसम्म निर्माण गरेका अधिकांश सडक अवरुद्ध भएका छन् । कर्णाली राजमार्गमा पर्ने रामाघाट बजार डुबानमा पर्ने खतरा भएपछि मङ्गलबार राति नै बस्ती उठाइएको छ ।
राति नै रामाघाट बजारमा बसोबास गर्नेहरुलाई प्रहरीले उद्धार गरेको हो । हरेक वर्ष कर्णालीमा बहाव बढेसँगै रामाघाट बजार नजीक बग्ने रामाघाट खोला थुनिने र खोला नजीकै रहेको बजार जोखिममा पर्दै आएको छ । सुरक्षित स्थानमा बस्ती स्थानान्तरण गर्न हरेक वर्ष कुरा उठे पनि दिगो समाधानका लागि भने अहिलेसम्म काम भएको छैन ।
