काठमाडौं । अन्य क्षेत्र जस्तै कोरोना संक्रमणको प्रभाव नेपाली सेनामा पनि देखिएको छ । अहिलेसम्म नेपाली सेनाका २ सय ४६ जनामा कोरोना संक्रमण पुष्टि भैसकेको छ ।
सेनामा जेठको पहिलो सातासम्म संक्रमण देखिएको थिएन । जेठको दोस्रो सातामा पहिलोपटक एक सेनामा संक्रमण देखिएको थियो । त्यसयता संक्रमण बढेको बताइएको छ ।
संक्रमितमध्ये ८४ जना कोरोना मुक्त डिस्चार्ज समेत भैसकेका छन् । अहिले सबैभन्दा धेरै संक्रमित भने प्रदेश २ स्थित मध्यपूर्वी पृतनामा रहेको नेपाली सेनाले जनाएको छ । संक्रमित मध्ये १ सय ६२ जना सेनाको आइसोलेशन वार्डमा उपचाररत छन् । काठमाडौं उपत्यकामा भने २० जना संक्रमित उपचाररत रहेको सेनाले जनाएको छ ।
संक्रमण पुष्टि भएका सेनामध्ये फ्रण्टलाइनमा खटिने बढी रहेको बताइएको छ। नेपाल–भारत सीमानाकाका १० स्थानमा सैनिक खटिएका छन् । अनुमति लिएकाहरूलाई सीमानाका प्रवेशमा सहजीकरण गर्ने, होल्डिङ सेन्टर व्यवस्था गर्ने, हेल्थ डेस्क सञ्चालन गर्ने सेनालाई जिम्मेवारी छ ।
सेनाले भने कोरोना संक्रमितको लागि ब्यारेकभित्रै आइसोलेशन वार्ड राखेको छ । कन्ट्रयाक्ट ट्रेसिङका लागि पनि टिम बनाएको छ । यस्तै काठमाडौंबाहिरबाट भित्र आउने सैनिकलाई १४ दिन अनिवार्य रूपमा क्वारेन्टिनमा राख्ने प्रोटोकल बनाएको छ ।
